GBU GM naammassimmat: Klubbit qulaajaaffigineqartariaqarput
Ippassaani sapaammi isikkammik arsaalluni pissartanngorniutivinnermi B-67 Nuummeersoq Iluliarmiunut N-48-mut 3-1-mik ajugaalluni ukiut tallimat tulleriit pissartanngorpoq.
B-67 ukiut arfineq-marluk tulleriisillugit pissartanngorniutivinnerni peqataavoq, tamannalu GBU-mit maluginiarneqanngitsuunngilaq.
- B-67-ip klubbitut aaqqissuussaanera ajunngilluinnarpoq. Meeqqaniit oldboysit tikillugit unammisartuutigivaat, aallunneqarluarlutillu.
- Klubbit allat aamma aallussigaluarput, soorlu N-48-kkut aamma aallussilluartut. Kisianni B-67 aaqqissuussaalluartorujussuuvoq, taamaattumik iliuusaat aaqqissuussaanerallu klubbinut allanut takusassanngorlugu siaruarterneqarsinnaavoq, Kalaallit Nunaanni Arsaattartut Kattuffianni, GBU-mi, siulittaasoq John Thorsen KNR-imut oqarpoq.
Qulaajaanissaq pingaaruteqartoq
Nunatsinni arsaattartut siuarsarniarlugit suliniuteqassagaanni klubbit assigiinngitsut suut pisariaqartinneraat qulaajarneqartariaqartut GBU-mi siulittaasoq isumaqarpoq.
- Kikkunuku kinguuttooqqasut? Sumiuna suna pisariaqartikkaat? Qanoruna iliuuseqartoqartariaqartoq? Kalaallit Nunaanni Timersoqatigiit Kattuffiat, GIF, sungiusaasunik peqatigiiffilerinermillu pikkorissaajartorluni illoqarfinnut assigiinngitsunut angalaarnikuuvoq. Taakku saniatigut suut pisariaqartinneqarnersut qulaajartariaqarput, John Thorsen oqarpoq.
- GBU-mit ukiuni tulliuttuni sungiusaasunik, dommerinik klubbinilu aqutsisunik GIF DBU-lu suleqatigalugit qaffassaaniarluta pikkorissaasussaavugut. Ukiualuillu ingerlanerini inissikkiartornissaat sulissutigisussaallugu, GBU-p siulittaasua oqarpoq.
Kajumissutsimik sulisut pisariaqartut
GBU-p siulittaasuata Nunatsinni klubbit malinnaaffiginerini maluginiarsimavaa klubbit ilaat kajumissutsimik sulisinnaasunik amigaateqartartut.
- Nuummi B-67-p piumassutsimik sulisut amerlasuut torrallallugu nassaarisimavaat. Sinerissamili nalunngilara inuit ataasiakkaat qimuttuartut annerusumillu ulluinnarni taperserneqaratik. Allaanerussutit tamakkua qulaartinnagit ataatsimut siuariartortoqarnissaa qulakkiissallugu ajornarpoq.
- Taamaattumik qulaarinninniartariaqarpugut paasiniarlugu sumiuna suna amigaataasoq.
- Kisianni tassa inuit piumassusillit sumi tamaani amigaataasarput, Thorsen naqissusiivoq.
Inuusuttut pikkorissut
GBU-p siulittaasuata pissartanngorniuunnermi peqataasut pikkorilluinnartunik ilaqartut maluginiarsimavaa. - Inuusuttararpaaluit sukariivinnikut peqataapput. Taakkuusinnaappullu arsaaffimmi ivigaasani sungiussisimasut, sukkasuumik aaqqissuussaasumik arsarsinnaasut siunissami takusalerumaakkagut.
Taakkuuppat qallunaat nunaanni Superligami takusalerumaakkagut?
- Ingasaallugu, John Thorsen nuannaarluni illalaajutigaluni oqarpoq.
Pissartanngorniuunnerni unamminerit uani takuneqarsinnaapput