GBU GIF-imit aninissaminik sioorasaarivoq
Kalaallit Nunaanni Timersoqatigiit Kattuffiata, GIF-ip, Kalaallillu Nunaanni Isikkamik Arsaattartut Kattuffiata, GBU-p, akornanni aaqqiagiinngittoqartuarsinnarpoq, GBU-llu GIF-imiit anilluni nammineerluni ingerlasinnaalernissaa ilaatigut eqqarsaatersuutigineqarluni.
Isikkamik Arsaattartut Kattuffianni siulittaasoq Lars Lundblad ima oqarpoq:
- Inatsisileritooq oqaloqatigigatsigu eqqarsaatigaarput GBU Timersoqatigiit Kattuffiannit anilluni nammineerluni ingerlasariaqartoq. Timersoqatigiit Kattuffiata taamaasilluni ilaasortat affangajai annaassavai, aningaasatigullu tamanna Timersoqatigiit Kattuffianut naleqassaaq, Lars Lundblad oqarpoq.
GBU-p akiligassai 500.000-it koruunit missaanniittut GIF-ip siorna 2010-mi akilerpai, GBU-milu sinniisuutitat immikkut ittumik ataatsimeersuarnissaat kissaatigalugu.
- Arsaattartut Kattuffiannut piumasariinnarnikuuarput klubbit 14-it malittarisassat malillugit ataatsimeersuarusunnerat ataqqeqqullugu piviusunngorteqqullugulu, GIF-ip siulittaasua Nuka Kleemann oqarpoq.
Qeqertarmiut Ålandimi 2009-mi unammiuaarneranni arnat angutillu arsaattartut peqataatinneqarput, aningaasat 450.000-it koruunit taamanikkut akiitsorineqalerlutik. GIF aamma GBU kingorna isumaqatigiissusiorput akiitsut taakku akilersorneqassasut, Lars Lundbladillu oqarnera naapertorlugu aningaasat taakku 2010-p naajartulernerani akilerneqarput.
Taamaattorli GIF-ip piumasaraa GBU-mi sinniisuutitat piaartumik ataatsimeersuartinneqassasut, Lars Lundbladilli oqaatigaa siusinnerpaamik tamanna ukiaru pisinnaassasoq:
- Oktobarimi aatsaat ataatsimeersuarnissarput aalajangernikuuarput. GIF-ip aningaasatigut mattussinerata kingornatigut ataatsimeersuarneq aningaasassaqartinnginatsigu tamanna aalajangerparput, ukioq mannalu suliassavut naammasseqqaarusukkatsigit, Lars Lundblad oqarpoq.
GBU-p akiitsoqarsimanera pissutaalluni GBU aningaasatigut GIF-imit maanna aqunneqarpoq, Lars Lundbladilu oqarpoq GBU-mi siulersuisut GIF-imit pisussaaffiiarneqarsimasutut misigisimasut:
Nuka Kleemannili akerlianik oqarpoq GBU pisussaaffiiarneqarsimanngitsoq:
- Aningaasat kattuffinnut assigiinngitsunut agguaanneqartartut uagut akisussaaffigivavut. Namminerlu aqussinnaanngippatigit akisussaaffik taanna uagut tigummissavarput. Akiitsoqaleriarlutik akiligassat akilerpavut, taamaammaat qaqqaqqalaaruteqassanngillat, Kalaallit Nunaanni Timersoqatigiit Kattuffianni siulittaasoq Nuka Kleemann oqarpoq.