Gazami sakkuaakkunnaarnissamik isumaqatigiissut unioqqutippaat
Israelip ilaani Gazami, unnuap-qeqqaniit sakkuaakkunaarneq nalunaaquttap akunnialunnguaannarnik sivisussuseqarpoq, kingumut aassunneqisumik saassussinerit ullaaq aallarteqqimmata.
Islamimik upperisallit Hamasikkut Fatah-p isumannaallisaanermut oqartussaata pisortaata Gazami illuanik saassussinerat inuit sisamat inuunerannik akeqarpoq. Taama pisoqanngitsiartoq præsident Mahmoud Abbasip allaffeqarfia qaartartunik aamma eqqorneqarpoq, inunnik ajoqusiiffiunngitsumik.
Gazami ippassaq akersuunnerni palæstinamiut 16-t toqutaareersullu sakkuaakkunnaarnissaq – egyptenimiut akunnermuliuttoralugit - Hamasip Fatah-llu isumaqatigiissutigigaluarpaat.
Ippassarli unnukkut isumaqatigiissut atsiorneqareersorlu egyptenimiu – pissutsit qanoq innerinik alakkaatilluni – eqqaassisoqalermat assamigut aallaaneqarpoq.
Pisup nalerpiaani Hamasikkormiut aamma israelimiut najugaqarfiinut qaartartumeerisaqattaarmata, israelimiut 17-it ikiligaapput, ataaseq perululluni.
Israelimiut saassutarineqarnerannut Hamas akisussaasuulluni sapaatip-akunnerini kingullerni pingasuni aatsaavissuaq nassuerpoq, oqarluni saassussinitik israelimiunut akiniutaasut.