Gay Greenland kulturikkut nersornaasiuttakkamut innersuunneqartoq

Assilisanik saqqummersitsineq Jørgen Chemnitzimit pilersinneqarpoq, taanna ukiuni 2011-mi 2012-imilu Nuummi ukiumoortumik Gay Pridetertoqarnera arnaqatinoortunik anguteqatinoortunilli 61-nik assiliisarsimalluni.

Taassuma assilisani katersorlugit saqqummersitsineq Gay Greenland pilersippaa, assilisallu 1 x 1 meterinngorlugit takutinneqarput assilineqartullu tamarmik immikkut anguteqatiminnik arnaqatiminnilluunniit atoqateqartarnertik pillugu oqaaseqaateqartinneqarlutik.

Inuit 61-it oqaluttuaat Axgillip kulturikkut nersornaasiuttagaanut Københavnimi februaarip sisamaani ukiormanna tunniunneqartussamut maanna innersuunneqarput.
 
Saqqummersitsineq Nunani Avannarlerni Piorsarsimassutsikkut Attaveqaammit Aningaasaateqarfik Sermimit tapiiffigineqarluni suliarineqarpoq. Taamanilu suliaqartitsisoq tassaavoq Leise Johnsen Kalaallit Illuutaanni Københavnimiittumi ullumikkut pisortaasoq.

Nersornaasigassatullu innersuunneqartik taassuma nuannaarutigaa.
 
- Ajugaassagutta aningaasartaqassappat Kalaallit Nunaanni arnaqatinoortunut anguteqatinoortunullu peqatigiiffimmut pilersinneqaqqammersumut - Qaamanermut - tunniunneqassapput kulturikkut aaqqissuussinernut atorneqassallutik.

Taassuma ilisimatitsissutigaa kikkulluunniit - aamma nunatsinniittut - Gay Greenlandip nersornaasigassatut innersuunneqarnerani taaseqataasinnaasut nittartagaq una aqqutigalugu: out-and-about.dk./axgill2015/
 
Gay Greenland siornatigut kulturikkut illorsuarni Katuami Nuummiittumi, Taseralimmi Sisimiuniittumi aammalu Nunat avannarliit illuni Reykjavikimi Thorshavnimilu kiisalu nunatsinni kommunit allaffiini annikinnerusunngorlugu saqqummersinneqarsimavoq.