Gasolinikkut katersuuteqqipput

Rockimik nipilersortartut Gasolinikkut ukiut 30-ngajaat matuma siorna avissaartuunermi kingorna siullermeerlutik ualimut nipilersoqatigiittarnertik pillugu apeqqarissaarfigineqarnerminni nuannaalaavissorput.

Gasolinikkut filmiliarineqarnerat ullumi takuteqqaarneqarmat nipilersoqatigiit katersuuteqqipput.

Nipilersortartut oqaluttuarisaanermi pingaaruteqartut ukiut 30-ngajaat matuma siorna avissaartuutereerlutik ullumi tusagassiortunik katersortitsipput. Nipilersoqatigiit sisamaat, erinarsortup Kim Larsenip, tumerparpaartup Søren Barlevip, qatitoortup Villy Jønssonip guitarertullu Frans Beverlip atortarsimasatik taama nuannarineqartiginerat paasiuminaatsippaat.

- Taamani nipilersortarallaratta nuannarineqarpugut paasisinnaalluarpara. 1978-imi avissaarpugut ukiullu 30-ngajaat nipilersoqatigiissimanngikkaluarluta nuannarineqaleraluttuinnarnerput assut upperiuminaatsippara. Allaanngilaq qangarsuaq nipilersortartoq tusaamasaq uummartiinnariarlugu tusarnaaqqitaq, uangaanngitsoq, Gasoliinikkut ilaat oqarpoq.

-Sukaruttornitta nalaani piumassuseqartorujussuuvugut tamannalu tusaamaneqaatigigunarparput, ilaat nangippoq.

- 70-kkunni nutaanngoriartornerup nalaani tusaamaneqalerpugut. Ineriartorneq ullutsinni tamanna suli malunnartarpoq. Ullumikkut aatsaat nipilersortalersimasuugutta taama tusaamaneqartigilersimassanngikkaluarpugut. Taamanikkut suut tamarmik pinngoraleruttorneranni tusaamaneqalerpugut. Erinnioriaatsit assigisaallu tamarmik nutaajupput, tamannalu eqqorluarlugu tusaamaneqalerpugut, Kim Larsen tusagassiortunut oqarpoq.