Galathea-mi ilisimasassarsiorneq isornartorsiorneqarpoq

Galatheap umiarsuaa ilisimasassarsiornermut atorneqartussaq Vædderen maanna Australiamut annguppoq. Nunarsuarlu kaajallariarniarlugu ingerlaqqittussanngortullu nalinginnaanngitsumik sakkortuumillu aviisip Jyllands-Postenip tusagassiortuanit Anders Lund Madsenimit isornartorsiorneqalerput.

Taassuma ilisimasassarsiorneq tamanna meeqqanut inuuissiortitsisuusisutut taavaa, Dansk Ekspeditionsfond-imilu sulisut (tassa Danskit ilisimasassarsiornissanut aningaasaliisartuanni sulisut) nukappiaqqatut qunutuutut taakkartorlugit. Tusagassiortoq isornartorsiuisoq isumaqarpoq tapiissuteqarnermik suliallit kimilimmik ilisimasassarsiortitsinissaq siunertaralugu tapiisartussaagaluartut qulakkeeriigaannaat kisiisa pinnagit.

Taanna ilaatigut allaaserinnippoq, nammineq soorlu takusimasani najoqqutaralugu timmissanik immikkut ilisimasallit Nuup qeqertallu Azore-t eqqaani timmissanik misissuisarsimasut uffalugooq tamatuma nalaani timmiaqalaanngiivissoq.

Tusagassiortup Anders Lund Madsenip aammattaaq qilalukkat pillugit ilisimatuut arlallit sulinerat uparuartorpaa, taakkugooq qilalukkat nipaannik tusarnaarniartartussaagaluarlutik alla tusaaneq ajorpaat

Umiarsuup Vædderenip motoriata ingerlarpalunnera.

Umiarsuaq Vædderen aqagu Salomonip qeqertaanut ingerlaqqissalluni aallassaaq. Galathea-llu ilisimasassarsiornera katillugu 200 million-i missaanni akeqarpoq.