Gaddafi suli Libyamiippoq

Libyami naalagaaffiup tv-qarfiani sivikitsuararsuarmik apersorneqarnermini Muamar Gaddafi oqarpoq, suli Libyami illoqarfiit pingaarnersaani Tripoli-miilluni.

- Frankrigimiinngilanga imaluunniit Venezuelamiinngilanga, soorlu tamanna tusatsiakkatut oqallisaagaluartoq...Suli Tripolimiippunga, Gaddafi 22 sekuntini apersorneqarnermini taama oqarpoq.

Gaddafi biilit qaqortut igalaavisigut niaqquni anillatseriarlugu oqaatiginiakkani taama oqaatigaa.

Tamatuma peqatigisaanik Libyami kisermaassilluni naalakkersuisumut tassunga akerliuniarneq siaruaakkaluttuinnarpoq.

Libyami sakkutuut qullersaasa arlallit sakkutuut kajumissaarpaat "innuttaasunut ilannguteqqullugit" Gaddafi taamaalilluni uppitinneqarniassammat, tv-qarfik al-Jazeera taama nalunaarpoq.

Libyap nunani assigiinngitsuni aallartitai arlallit aamma taamatut nalunaaruteqarput. Nunani tamalaani aallartitat, akerliussutsimik takutitsisunut sakkulersorsimanngitsunut toqoraanerpassuit akerliuniarfigalugit, atorfimminnit tunuarnertik nalunaarutigaat.