Gaddafi pissaaneerukkiartorpoq

Libyap kangisinnerusortaani illoqarfimmi Tobrukimi Gaddafimik tapersersuisut qimaatinneqarsimammata inuit nuannapput. Illoqarfiup avatinnguani sakkutooqarfimmi sakkutuut Gaddafimik tapersersuiunnaarsimasut aamma takuneqarsinnaavoq. Sakkutooqarfik inoqanngingajappoq, sakkutuullu tassaniittut sakkutooqarfimmik paarsiinnarnerarput. Taamaalilluni Libyap kangisinnerusortaani Gaddafip pissaaneerussimanera ilimanarsivoq. Egyptenimiut Libyamiit aqqusinikkut qimaasut aamma oqaluttuaannut tamanna naapertuuppoq. Akerliuniat aallartiffianni Libyap kangisinnerusortaani Benghazimi aamma inuit ullumi nuannapput. Libyalli kangisinnerusortaani Gaddafi pissaaneerukkaluartoq suli tamanna toqqissisimananngilaq. Inuit sakkulisartut aqqusinerni takussaasut kikkunnik tapersersuinersut takuneqarsinnaanngilaq.

Libyap kippasinerusortaani Gaddafip pissaaneqarnini attatiinnarniarsaraa. Illoqarfiillu pingaarnersaani Tripolimi iluatsitsisimagunarpoq - aqquserngimmi inoqanngillat.

BBC-miilli nutaarsiassat naapertorlugit, Libyap kitaani illoqarfiit arlallit aamma akerliussutsimik takutitsiffiusalerput.

Libyami ministerit ilaata Libyap kangisinnerusortaani al-Qaedameersut islamisiortunut naalagaaffiliorsimanerarpai.

Pikitsitsinermi inuit toqutaasut amerlassusaat oqaatigiuminaappoq. Inuit 400 missaasa toqutaasimanissaat nuit pisinnaatitaaffii pillugit suliniaqatigiit nalunaarutigaat, allalli oqalupput 1000-init amerlanersut toqutaasimasinnaasut. Tusagassiuutit nunanit tamaneersut nalunaarput, akerliussutsimik takutitsisut sakkunik sakkortuunik saassunneqartartut sakkutuullu akerliusunut ilanngussimasut aamma toqunneqarsimasut.

Libyamiit qimaasimasut assilisimasaanni inuit 20-t toqutaasimasut, ilaat sakkutuutut atisallit takuneqarsinnaapput. Tamarmik pukusummikkut aallaaneqarsimasut.

Nunat EU-mut ilaasortat Libyamut, pisortaanullu Muammar Gaddafimut killilersuutissaminnik isumaqatigiissuteqarsimapput. Killilersuinerit Libyamukaqqusiunnaarnermut sakkunilluunniit tuniseqqusiunnaarnermut tunngasuusinnaaput.

Libyami susoqarnera radioaviisimiit malinnaaffigiuarparput.