GA: Namminersornerullutik Oqartussat piginneqataassanngillat
Inatsisartut Alcoa-mut tunngatillugu ataatsimiititaliaata nunatta piginneqataanissaa inassutigaa, Sulisitsisulli Peqatigiiffiat isumaqataanngilaq.
- Aarleqqutissat amerlavallaaqaat, isumaqarpugullu Namminersornerullutik Oqartussat inuussutissarsiutinut toqqaannartumik maanna attuumassuteqarpallaareersut, pisortaq Henrik Leth tallimanngormat ataatsimiinnermi oqarpoq. Tamanna nittartakkami ga.gl-imi atuarneqarsinnaavoq.
- Alcoamut tunngatillugu nalunartut maanna amerlaqaat iluanaarutaasinnaassusialu suli qulakkiivinneqanngilaq. Maniitsup avataani inuussutissarsiutinik ineriartortitsinermut aamma ajoqutaaginnaratarsinnaavoq. Nunatta Karsiata nalorninartunut aningaasaleeqataanissaa eqqarsarnaqaaq, taamaammat aningaasaliisarnernik ingerlatallit aningaasaliisoqassappat isumaginnittuusariaqarput, GA isumaqarpoq.
Sulisitsisut Peqatigiiffiat aamma isumaqarpoq inuiaqatigiit piginneqatigiiffiit sinneqartoorutaasigut, sulisut akileraarutaasigut aatsitassarsiornissamillu akuersissutit aningaasartaasigut isertitaqassaqqaartut, Nunattali Karsia isertitassatigut nalorninartulinni aningaasaliissuteqartariaqanngitsoq.