GA-mit akilersorneqarneraaneq ilumuunnginnerarpaa
Suliniaqatigiiffik Transparancy Greenland misissuisimavoq qanoq pisortat suliffiuteqarfii ingerlariaaseqarnersut, tamannalu isumaqatigiinngisitsinermik aallarniisimavoq Sulisitsisut Kaffuffiata Naalakkersuisullu Aatsitassaqarnermut Ikummatissaqarnermullu akornanni.
Sulisitsisut Kattuffiata GA kissaatigivaa Transparencip Greenlandip misissuisimanera tunuliaqutingalugu Aatsitassaqarnermut Ikummatissaqarnermullu inatsit iluarsaanneqaqqissasoq. Ove Karl Berthelsenili isumaqarpoq misissuisimaneq inernileriigaasoq.
- Sulisitsisut Kattuffiata inerniliisimaneq nalunngilaa sulili misissuisoqanngitsoq, Over Karl Berthelsenip tusagassiuutinut nalunaarummi oqaatigaa. Radioavisimullu oqarluni "suliassaq suliassiissutigereerneqarsimassasoq".
Taamatut nalunaaruteqarneq suliffeqarfimmi CSR-imi Allaffimmi Pisortamit Anne Mette Christensenimit ilumuunnginnerarneqarpoq, CSR Transparency Greenlandip misissuinerannut aallarniisut ilagivaat.
- Periuseq nunanit assigiinngitsuneerpoq Europamilu nunani 20-ni atorneqarluni. Sulisitsiut periuseq nassaarinngilaat. Arlaannaataluunniit misissuisimaneq sunnerniarsinnaasimanngilaa, Anne Mette Christensen Sermitsiamut oqarpoq.
Misissuisimaneq qallunaat suliffeqarfiutaata Nordic Consulting Group ingerlassimavaa. Suliffeqarfimmi siunnersortit apersorsimavaat soorlu pisortat suliffeqarfiutaanni atorfillit, ilisimatusartut suliffeqarfinnilu aqutsisut. Transparency Greenland Sulisitsisut Kattuffiatalu apersuisimasut aqussimanngilaat, taama naqissusiivoq Anne Mette Christensen Sermitsiamut.