GA: Inissianik tuniniaaniarneq akisussaassuseqanngitsuliorneruvoq
Inissiat attartortitat Nuummi Qinngutsinniittut tuniniarneqarnissaat, aningaasanut inatsisissap aappaagumut atuuttussap Naalakkersuisunit saqqummiunneqarnerani tamanna erserpoq. Naalakkersuisut siunertaraat inissianik tuniniaanermi Nunatta karsiata tamanna iluaqutigissagaa.
Tamanna eqqarsaatigilluagaanngitsoq, Sulisitsisut Peqatigiiffiata pisortaa, Brian Buus Pedersen isumaqarpoq.
- Inuiaqatigiit aningaasaataannik misileraaneruvoq pinnguarneq, akisussaassuseqanngitsuliornerullunilu, Brian Buus Pedersen oqarpoq.
Inissiat 420-it Oqartussanit tuniniarneqaleriasaarpata, tamanna inissianik niuffannerup pitsaanngitsumik kinguneqalersinnaanera, Brian Buss Pedersen aarleqqutigaa asserasuutitullu taallugu, Nuummi inissiat 420-it ataatsikkut tuniniarneqarneri, Københavnimi inissianik 40.000-init ataatsikkut tuniniaanermut.
- Inissiat tuniniarneqartut pisiarineqartartullu Nunatsinni ullumikkut akii oqimaaqatigiipput. Inissialli 420-it ataatsikkut tuniniarneqalerpata, inissiat akii soorunami appariagaatsiartussaapput, tamannalu nammineq iniuteqartunut sunniutissaaq ajortumik, Birian Buus Pedersen oqarpoq.
Demokraatit siulittaasuata, Jens B. Fredriksenip paragraf 37 naapertorlugu apeqquteqaateqarnermini tikkuarpaa, inissiat taama amerlatigisut tuniniarneqarneranni Nuummi inissaasuanermut iluaqutaanavianngitsoq. Tamannalu Naalakkersuisut isumaqatigalugu allapput oqarlutik.
- Nuummi inissaasuaneq ukiuni tulliuttuni appariassasoq naatsorsuutiginngilarput, tassami Nuuk inuttusiartorpoq, Ineqarnermut Naalakkersuisoq, Miiti Lynge akissuteqaatimini taama ilaatigut allappoq.
Miiti Lyngep akissummini aamma naqissuserpaa, Naalakkersuisut siunertarimmassuk, Oqartussani sulisut ineqartitaasarneri annikillisikkiartuaarneqartussaasoq naatsorsuutiginerarlugulu, taamaaliornermi inissianik nammineq pigisaqarusuttut attartorusuttullu ukiuni tulliuttuni amerliartuaassasut neriuutiginerarlugu.
Taamali neriuuteqarneq Sulisitsisut Peqatigiiffiannit isumaqatigineqanngilaq.
- Naalakkersuisut taama isumalluartigigunik taava inissianik tuniniaanerup qanoq kinguneqarsinnaanera pillugu takussutissiisariaqarput, takussutissamilli taamaattumik suli takusaqanngilanga, Brian Buus Pedersen oqarpoq imalu nangilluni.
- Inissiat pillugit aaqqissueqqinnissaq pisariaqarpoq. Nunatta aningaasanik isaatitsinissaa kisiat eqqarsaatigalugu aaqqiisoqalerpoq, politikkikkut aaqqiinissaq tunulliullugu.
Kalaallit Nunaanni Sulisitsisut peqatigiiffiata pisortaa, Brian Buus Pedersen taama oqarpoq.
