GA: Ilinniartitaaneq aningaasanut inatsisissami inikippallaarpoq

- Aningaasanut inatsisissatut siunersuut nutaartaqanngilaq, eqqarsartaasitoqaq atorlugu siunnersuusiaavoq, GA-meersoq Henrik Leth oqarpoq. Isornartorsiuinini tunngavilersorpaa, ilinniartitaaneq 2011-mi aningaasanut inatsisissami sammineqarpallaanngimmat.

Nunatta koruunit milliardit sinnerlugit ilinniartitaanermut atortarpaa, kisianni GA-p pisortaa isumaqanngilaq, aningaasaliissutit naammattumik Nunatta pissarsissutigisarai:

- Uuliamik nassaartoqassappat aatsitassarsiorfinnillu allartittoqassappat, kalaallillu sulisinnaasut tamakkunani sulissappata, taava ilinniartitaanerup pitsaanerunissaa pisariaqarpoq. Taava kissaateqarnerinnaq eqqarsaarsersorujoornerlu qimallugit piviusorsiorneq tikinneqartariaqarpoq, Henrik Leth oqarpoq.

Taassumali nuannaarutigaa, isumaginninnikkut suliniutit aamma aappaagu ingerlateqqinniarneqarmata.

- Meeqqanut inuusuttuaqqanullu siorna suliniutaasimasut iluareqaagut, nuannaarutigaarpullu ukioq manna aamma ingerlateqqinneqassammata. Nalunngilarpulli taassuma suli annertunerusumik ingerlanneqarnissaa pisariaqartinneqartoq, sulisitsisut peqatigiiffianneersoq oqarpoq.

Kisianni Nunatta Karsiani atoriaannarnik aningaasaqanngilaq. Naalakkersuisut nunani allaniit aningaasarpassuarnik atorniassapput, aningaasanillu atuinissamut tunuarsimaarnissaq pisariaqarpoq. Aningaasaqarnermut naalakkersuisoq Palle Christiansen, aningaasanut siunnersuummik, akitsuutinik nutaanik ilaqartumik, saqqummiigami oqarpoq.

Henrik Lethili isumaqarpoq, politikerit avatangiisinut akitsuutinik nutaanik eqqussisariaqanngikkaluartut. Aningaasat allani pissarsiarineqarsinnaapput:

- Aatsitassarsioqatigiiffinni nunani allaneersuni sulisut Kalaallit Nunaanniikkaangamik ilumut nunatsinnut akileraarutissaat tamakkerlugit tiguneqartarunanngillat. Takusinnaasagummi naapertorlugit tamanna aallunneqarpallaanngilaq. Taava malittarisassanik malitsitsiniaaneq aalluunneqarnerusariaqarpoq, immaqalu pisariaqarpat sukaterlugit, GA-p pisortaa Henrik Leth Oqarpoq.