GA: Akitsuusiinissaq piffissaanngilaq
Taamaammat saarullinnut qaleralinnnullu Nunatsinni tunisassiarineqanngitsunut akitsuutissat nutaat Naalakkersuisut tunuartimmatigit, Sulisitsisut Peqatigiiffiata pisortaata, Henrik Lethip iluaraa. Aalisariutikillisaanermullu piffissaq atorneqassasoq, GA isumaqarpoq.
Saarulliit akii siornatigut takusartakkatsinnut naleqqiullutik maanna affaannanngorsimamammata, aalisartitseqatigiiffiit tamarmik ajornartorsiorput. Aalisartitseqatigiiffinni sisamani, naatsorsuutiminnik saqqummiussisimasuni, siorna amigartoorutit katillutik 45 millioni koruuniupput. Aamma akiitsui pigisaannit nalilinnit amerlanerullutik.
- Taamaammat 20 millioni koruunit sinerlugit nutaanik akitsuusiinissamut tunngavissaqanngilaq, Henrik Leth oqarpoq.
Naalakkersuisut aappaagumut aningaasanut inatsisissatut siunnersuumminni, saarullinnut qaleralinnullu Nunatsinni tunisassiarineqanngitsunut akitsuusiinisaq ilaatikkaluarpaat.
Saarullinnut kiilumut koruunimik qaleralinnullu kiilumut 2 koruunimik aalisartut akilisassasut siunnersuutaagalarpoq.
Henrik Leth isumaqarpoq, avataasiorlutik saarullinniartut qaleralinniartullu inuiaqatigiinnut naammattumik tunniussaqartareersut, assersuutigalugu sulisut akileraarutaasigut.
Akitsuusersuisoqassappallu marlunnik pisoqartariaqartoq, GA isumaqarpoq.
- Siullermik akit qaffattariaqarput. Aappassaanik inuussutissarsiortuni nukittorsartoqartariaqarput, tassalumi taanna oqartussanik oqaloqatiginnissutigissavarput, aalisartitseqatigiiffiit sisamat tallimat ullumikkut avataasiorlutik saarullinniarlutilluunniit qaleralinniarput, imaassinaavorlu amerlavallaartut. Tassa Naalakkersuisut siuliiisa tukkorlutik saarullittaassanik qaleralittassanillu tunniussuisarsimanerisa kinguneraat, Henrik Leth oqarpoq.
Akitsuusiinnissamik siunnersuut saqqummiunneqarmalli, akitsuutinut nutaanut akissaqaratik, avatasiorlutik aalisartut oqarput. Kisianni tamanna tusaaniarneqanngilaq, Hentik Lethilu maanna neriuppoq, aalisartut oqaatiginiagaannut politikerit siunissami tatiginninnerussasut.
- Soorluuna aalisartunut tatiginnittoqarsimanngitsoq. Maanna tamanna illuatungeriilluta qangerniartariaqarparput, tatigeqatigiilluta siunissami suleqatigiiniassagatta, Henrik Leth oqarpoq.
