GA aamma Naalakkersuisoq: Sulisitsisut akiitsui annikitsuinnaapput
Sulisitsisut 1000-it tungaanut amerlassuseqartut sulisumik akileraarutaannik A-skattinik katillugit 350 millionit koruuninik akiitsoqartut Akileraartarnermut Aqutsisoqarfiup saqqummiuppaa. Tamanna Sulisitsisut Peqatigiiffiannit upperiumaneqarani Akileraartarnermut Aqutsisoqarfimmi akileraarutinik nalunaarsuisoqartannginneranik uparuaasoqarpoq.
- Oqaatigineqassaaq una oqallinneq ajuusaarnartumut saqissimasoq inuiaqatigiit akornanni imannak paasineqarsinnaasutut; Sulisitsisut ataatsimut oqaatigalugit pisuutinneqartut akileraarutinik A-skattinik akiliineq ajortutut, tusagassiuutinut nalunaarummi ilaatigut taama allassimasoqarpoq.
Tamannalu Aningaasaqarnermut Naalakkersuisoqarfimmit ajuusaarutigineqarpoq, kisitsisillu saqqummiunneqarnerini taamatut paasineqartussaanngikkaluarput. Tassami Akiitsut eqqartorneqartut piffissaq sivisooq atorlugu katersaasimapput, taamaalilluni akileraartarnermi isertitanit tamakkiisunit annikinneeraallutik.
