G8-t inerniliipput
Naalagaaffiit suliffissuaqarnikkut siuttuusut, G8-kkut Tysklandimi ataatsimiinnerat ullumikkut naammassivoq. Nunani taakkunani naalakkersuinikkut siuttuusut ulluni marlunni ataatsimeeqatigiinnerminni nunarsuarmioqatigiit ajornartorsiutaat oqaluuseraat, ilaatigut immikkut sammineqarlutik apeqqutit silaannaap allanngoriartorneranut tunngasut, qaartartunut igeriuttakkanut illersuusiorniarneq aamma Afrikami ajornartorsiutit.
Ataatsimiinneq iluatsitsiffiulluaqaaq. Naatsorsuutigineqanngikkaluartumik silaannaap pissusaa pillugu isumaqatigiissuteqartoqarpoq. Qaartartunut igeriuttakkanut illersuusiornissaq avissaartuuffiunngilaq aamma USA-p Ruslandillu akornanni sorsunnerup nillertup nalaanisulli sakkussalerngusaannissaq pinngitsoortinneqarpoq.
Kisianni ataatsimiinnermik malinnaasut akornanni aamma ataatsimiiffiup qanittuani akerliussutsimik takutitsisunit nunanut ineriartortunut annerusumik tapissuteqartoqannginnera naammagineqanngilaq. Nunanik piitsuunerpaanik illersuisut nuannaarutissaqarpallaanngillat. Taamaattorli anguniarneqartut ilagaat nunat G8-mut ilaasut ukiut marluk matuma siornagut ataatsimiinnerminni neriorsuutigisatik ingerlateqqissagaat, tamannalumi iluatsippoq.
Siusinnerusukkut G8-mi ataatsimiinnerit naalakkersuinikkut siuttuusut pisussaaffiliinerunngitsumik oqaloqatigiiffittut atortaraluarpaat, maannali immaqa tamanna allanngoriartulerpoq.
Ataatsimeeqatigiinnissaq piareersarluagaasutut oqaatigisariaqarpoq. Soorlu upernaap ingerlanerani EU-mi silaannaap allanngoriartornera pillugu aalajangiussat tunngavigineqarput.
Aammattaaq piareersarnermi nunat aningaasarsiornikkut siuariartorluartut ilaatinneqarput, soorlu Kina, India, Brazilia, Mexico aamma Sydafrika.
Tyskit kansleriat Angela Merkel tikeraartitsisuusutut ataatsimiinnermi qitiusumik inissisimalluartutut nalilerneqarpoq. Oqartoqarsinnaalluni Europami siuttuni katersuuffiulluassasoq, maanna Tony Blairip tunuartussanngornerani aamma Sarkozyp suli saqqumilaalinnginnerani. Ole Aabenhus DR-imeersoq taama naliliivoq.
