G8-mi isumaqatigiissut naammaginngilaat

Nunarsuarmi nunat pisuunerpaat arfineq-pingasut G8-nik taaneqartartut Italiami ataatsimiinnerminni nunat peqataatitaasa arfineq-marluk isumaqatigiissutigisaat, CO2-mik aniatitsinermik 80 procentimik ukioq 2050 nallertinnagu millisaanissaq uparuarneqarpoq.
Allattoq Najaaraq Egede
juulip 09-at 2009 07:10

CO2-mik aniatitsinermik millisaaniarneq nunat maannangaaq iliuuseqarnissaanik piumasaqaatitaqarpoq, soorlu ikummatissanik uuliamik aamarsuarnillu atuineq millisarneqangaatsiassaaq, nukissiuutinillu ataavartunik pilersitsisoqassalluni.

Iliuusissat pinngortitamik illersuiniaqatigiit Greenpeace-kkut tapersersoraluarlugit, uparuaatissaqarput.

- Sila pillugu iliuusissat qanoq akilersorneqassanersut ataatsimiittut eqqaanngilaat, aamma ukioq 2020 nallertinnagu iliuusissat qanoq piviusunngortinneqassanersut isumaqatigiissusiorfiginngilaat, Tobias Muenchmeyer, Greenpeacemi politikkikkut siunnersorti oqarpoq.

- Piffissaq sisuuginnavippoq, silap pissusaa allanngoriartorpoq, innuttaasut sunnerneqarput, isumaqatigiissutissallu suli anguneqaratik. G8-mi ataatsimeeqataasut isumaqatigiissutigisaat annikippallaaqaaq kingusinaarunneqarpallaarlunilu, uparuaavoq.

G8-mi isumaqatigiinngissutaasut aamma Danmarkimi sila pillugu ministerip Connie Hedegaardip uparuarpai oqarluni, maannamut angusat FN-ip aaqqissugaanik sila pillugu Københavnimi decembarimi ataatsimeersuarnissami iliuusissamik isumaqatigiissuteqarnissamut, aporfiusinnaasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq