G-7 ministerit puisit neqaanik neriartoqqusaagaluaramik takkutinngillat
Naggueqatitta Inuit Eqalunni najugaqartut, aningaasaqarnermut ministerit puisitoriartoqqullugit ippassaq qaaqqusimagaluarpaat, arlaannaalluunniit takkusimanngilaq. EU-p puisinit pisunit eqqusseqqusiunnaarnissamik aalajangernera illuatungilerniarlugu, puisit neqaanik sassaallerniarsimagaluarput.
Canadami aningaasaqarnermut ministerip Jim Flahertyp, aningaasaqarnermut ministerit nunani G7-ini ilaasortat arfinillit Eqalunni ataatsimeeqatiginiarlugit aggersarpai. Nunarsuarmi aningaasaqarnermut ministerit nuimanerit Eqalunni ataatsimiitinneqarnerinut siunertanut ilaavoq issittumi pissutsinik takusaqassammata, aammalu puisinniartarnerup naggueqatigiinnut inunnut pingaaruteqassusiata paasitinneqarnissaa pisariaqarmat, Canadami ilannngutassiortorput Marianne Stenbæk taama tusarliivoq.
Puisitoriartoqqusineq ippassaq unnukkut pisussatut aaqqissorneqarpoq, taamaalineranilu , Italiamiut Tuluillu pisortaat, aammalu Europami aqutsisut ilaat, qimusserput. Tyskit Franskit Italiamiut Tuluillu aningaasaqarnermut ministerii aningaaserivinnilu qullersat, puisitoriartoqqusilluni qaaqqusinermut peqataajumanatik nalunaarput. USA-p taamatullu Japanip aningaasaqarnermut ministerii takkutinngillat.
Canadap aningaasaqarnermut ministeria, Canadamilu aningaaseriviit qullersaata pisortaanerat neriartoqqusilluni qaaqqusinermut takkuttutuaapput. Puisitoriartoqqusilluni qaaqqusineq sioqqullugu aningaasaqarnermut ministerit arfinillit, puisinniartarneq pillugu isumaannik tusagassiortunit apersorneqarsimagaluarput, taakkuali tamarmik puisinniartarneq pillugu isummaminnik akissuteqarniarsimanngillat.
Naggueqatigiit Inuit puisinit pisunit EU-mut eqqusseqqusiunnaarnissamik peqqussummi ilaatinneqannginnerat Canadap aningaasaqarnermut ministeriata Jim Flahertyp erseqqissarpaa.
Nunat G7-imit pisunit aningaasaqarnermut ministerii puisitoriartornissaannut piareersaanneqarmata, issiavissaat puisit amiinit qallersorneqarsimagaluarput. Ministerit taakkua puisit neqaanik neriumanngitsut, puisit amiinit pisunit aaqanngitsunik aaqqatinillu tunissuteqarfigineqassapput. Puisittoriartoqqusisoqarmat saqisut puisit amiinit sulianik qalersaqassapput.
