Futsalimi nunani avannarlermiut Nuummi unamminissaat aappagumut kinguartippaat
Kalaallit arsaattartut kattuffiat KAK Nordic Futsal Cupimi ukiamut aaqqissuisuusussaagaluarpoq. Maannali KAKp nunat avannarliit isumasioreerlugit aaqqissuinissaq kinguartippaa. Corona pissutaalluni arsaannermi pisussarpassuit eqqorneqarput taamalu Europami unammisaqattaarnissaanut ulluliussat allanngortariaqalerlutik. Tamanna pissutaalluni nunat arlallit Nordic Futsal Cupimi peqataasinnaanissaat nalorninartoqalersoq, KAK nalunaarpoq.
AAMMA ATUARUK Kalaallit arsaannermi unammillersinnaasut
Pilersaarutit malillugit Nordic Futsal Cup Nuummi pisussaagaluarpoq. Toqqaannartumik KNR-TV-kkut aallakaatitsinissat aamma piareersarneqaleraluarput. Piffissali ingerlanerani KAK aamma nunani avannarlermiut ataatsimeeqattaarput ataasinngornermilu KAK nalunaarpoq aaqqissuisuunissaq kinguartinneqartoq.
Nalorninartoqarpallaarpoq
- Nordic Futsal Cupip Nuummi 2020-mi pinissaa eqqartungaatsiarparput, isumaqarpugulli aningaasaqarniarnernikkut timersornikkullu nalorninartut amerlavallaartut nunanit avannarlerniit angalanissamut killilersuisoqaratarsinnaammat, KAK-mi siulittaasoq Finn Meinel oqarpoq.
- Aamma isiginnaartut killilersorneqaratarsinnaapput unamminerillu killilersorneqarlutik. Taamaattumik illersoruminaappoq Nuummi decemberimi 2020-mi aaqqissuinissamut piareersarnissaq. Nunanit avannarlerneersut isumaqatigiissutigaat pissusissamisoornerusoq KAKp aaqqissuisuunissaata kinguartinneqarnissaa, Finn Meinel oqarpoq.
Nunat avannarliit futsalimi nunani tamalaani unammeqataasarput. Nunarsuarmili arsaanneq coronap ajornartoortitsinerani uninngavoq. Tamannalu pissutigalugu nunani tamalaani unamminissat kinguartinneqarput qaquguli pinissaat ullulerneqarani.
Immaqa appaagu
- Pissutsit taamatut inissinnerat ajuusaarutigeqaarput, taamatulli aalajangertariaqarpugut timersornikkut aningaasaqarniarnikkullu nalorninartoqarpallaarmat, Finn Meinel oqarpoq.
Maanna misissorneqarpoq Nordic Futsal Cupimi ukiormanna Sverige aaqqissuisuusinnaanersoq KAK-lli aappaagu aaqqissuisuunissaq suli piareersarfigissavaa.
Nordic Futsal Cup ukiumoortumik unammersuartarneruvoq tassanilu peqataasartut tassaapput Danmark, Finland, Norge, Sverige aamma Nunarput. Unammiuarnermi tassani ajugaasut ukioq taanna nunani avannarlernerni pissartatut nalunaarutigineqartarput.