Frimærkit nunat avannarliit killerneersut
Nunat Avannarliit Killiit Siunnersuisooqatigiiffiat ukioq manna ukiuni quliliivoq.
Ukiut qulit qaangiunnerat malunnartinniarlugu nunat avannarliit killiit allakkerisarfiini tassalu Kalaallit Nunaani, Islandimi kiisalu Savalimmiuni ataatsimoorlutik frimærkeliortitsinialerput.
Frimærkit tamarmik Nunat avannarliit killiit ilisarnaataanik assiliartaqartinneqassapput kiisalu avatangiisit paarilluarneqarnissaat taakkulu nukingat sammineqassallutik.
Frimærkemi savalimmiuniittussami assiliartarineqassaaq immap malissuisa nukingat, nunatsinnilu frimærkemi assiliartarineqassaaq erngup nukinga kiisalu Islandimi frimærkep assiliartarissallugu nunap kissarngata nukinga.
Frimærke aqqutigalugu saqqummersitsinermi nukiit pillugit assiliartaliinissamut peqqutaatinneqarpoq nunani avannarlerni killerni tamani nukissiuutit mingutitsisut pinaveersaartinneqarusummata akerlianillu nukissiuutit avatangiisinut mingutitsinngitsut ornigineqarnerullutik, soorlu imeq, mallit kiisalu nunap kissarnerata uunartui.
