Frimærkit nalliuttorsiornermi saqqummersitat nungulereerput

Sisimiut tunngavilerneqarneranit ukiunik 250–inngortorsiornermut aammalu savaateqarnerup 100–nngortorsiorneranut atatilugu, frimærkinik saqqummersitsisarfik, Tasiilami Filatelia, frimærkinik tamarmik immikkut 100 tusind-inik amerlassusilinnik saqqummersitsivoq.

- Iluatsilluarput. Allaat taakkua immikkut pisiariumaneqangaarmata tamarmik nunguliivipput, Filateliami ulluinnarni aqutsisoq Pertti Frandsen oqarpoq. Sisimiunut tunngasoq Miki Jakobsen–ip titartagarigaa savaateqarnermut tunngasoq Naja Abelsen –ip titartarsimavaa.

Frimærket tunisaanerujussuinut tuneqqinnerini akitsortarnerat pissutaanersoq apeqqutigineqarmat, Perrtti Frandsen akivoq: Aapp, tassani tuniniaanermi periaasiusartut atuutilertarput. Tassa pisiassat amerlanngikkaangat pilerngunneqartarput ukiullu ingerlanerini akii qaffattorujussuusarlutik. Tassaniippoq frimærkit Kalaallit Nunaanneersut nukittuffiat. Qeqertarujussuuvoq nunarujussuulluni kisiannili nalagaaffeerannguamiilluni. Naalagaaffeerannguillumi naalagaafferujussuarnut allanut naleqqiullutik frimærkinik taama amerlatigisunik tunisassiaqarneq ajorput.