Frimærkiarannguaq aningaasarpassuarnik iluanaarutaasinnaavoq

Frimærkinut pisortap Allan Pertti Frandsenip tusagassiortunik peqataasoqartillugu KIMIK-p siulittaasuanut eqqumiitsuliortumut Bodil ’Buuti’ Pedersenimut checki 100.000 koruuninik aningaasartalik tunniuppaa.

Ukiumoortumik frimærkip nalinganut tapiliussaasartup tunniunneqartarnera ileqquuvoq kusanartoq, Kalaallit Nunaanni inoqatit akornanni kulturikkulluunniit suliniutilinnut POST-ip tapersiissutigisartagaa. Aningaasat frimærkip, eqqumiitsuliortumit Ibalo Abelsenimit titartarneqartuo, ukiut pingajuat avillugu matuma siorna saqqummiunneqartup nalinganut tapiuliussap KIMIK-imut iluaqutissanngorlugit tuniniarneqarsimasumeersuupput.

- TELE-POST-imut nuanneqaaq Kalaallit Nunaanni kulturimik tapersersuisinnaaneq. Amerlaqaat qujanartumik frimærkimik immikkut ittumik taassuminnga 50 ørimik saniatigut akiliilaarlutik allakkamik nassiussilernerminni piserusuttartut. Aamma nunarsuatsinni tamarmi katersisartut frimærkip nalinganut tapiliussartalimmik pisinissaq nuannarinilerujussuuvoq, Allan Pertti Frandsen aningaasanik tunniussinermini oqalugiarluni oqarpoq.

KIMIK-miillu aningaasat sumut atorneqassanersut ilisimareerpaat:

- 2015-imi ukiunik 20-nngortorsiorluta nalliuttorsiornissatsinnut piareersarnissamut tunissut manna angeqisoq periarfissiivoq, taamanikkussamimi ilaatigut atuakkamik saqqummiiniarpugut, Buuti Pedersen oqarpoq.