Inuussutissarsiutit

Kujataani saarullinniarsinnaalerneq nuannaarutaavoq

Immikkut ittumik akuersissuteqarlutik kujataata avataani ukioq manna apriilip aallaqqaataanit maajip ulluisa 31-ataa tungaanut saarullinniartoqarsinnaasoq Naalakkersuisut akueraat.
Assi © : Nick Rahaim/Flickr Creative Commons
Allattoq Karsten Sommer
apriilip 20-at 2015 13:13
Nutserisoq Mads Lynge

Tamaani saarullinnik maannakkut aalisartoqarsinnaanngikkaluarpoq, saarulliit suffimmata. Naalakkersuisut tusagassiuutinut taama nalunaaruteqarput.

Aalisariummi aalisarnermut nakkutilliisoqarnissaa immikkut akuersissuteqarnermut atatillugu piumasaqaataassasoq, Pinngortitaleriffiullu ilitsersuutai malillugit annertusisamik misissugassanik tigusisoqartarnissaa aamma piumasaqaataasoq nalunaarutigineqarpoq.

- Maannakkut saarullinniarfigineqarsinnaasunngortoq tassaavoq imartaq Atlantikup Avannaata Kitaani Aalisarneq Pillugu Suleqatigiiffiup NAFO-p imartaanut ilaasoq 1F, sumiiffiilu ima nalunaaqutserneqarsimassapput Q5 aamma Q 6, Aalisarnermut Naalakkersuisoqarfik ilaatigut allappoq.

Kalaallit Nunaanni saarullinniarneq pillugu ingerlatsinissamut 2014-2016-imut pilersaarummi taakku allassimassapput, ataavartumik piffissami saarullinniarneq taamaalilluni qulakkeerneqassaaq. Tunisassiorfinni tunitsivinnilu sulisut aalisartullumi pingaarutilimmik suliassaqartinneqartalissasut Naalakkersuisut aamma allaaseraat.

Aamma atuaruk