Friendsimit ilisimaneqarluartup prins Harryp Meghanillu rekordiliinerat qaangeraa
Amerikamiu isiginnaartitsisartup, Jennifer Anistonip, isiginnaagassiami nangeqattaartartumi ”Friends”-imi Rachelitut inuttaanermini nunarsuarmi tusaamasanngortup prins Harryp nuliatalu Meganip nunarsuarmi immikkut ittumik rekordiliinerat qaangerpaa.
50-inik ukiulik, Aniston nittartakkatigut attaveqaqatigiittarfimmi Instagramimi piffissami sikinnerpaamik 1 millioninit malinnaaffigineqalerpoq. Rekordiliisartunik nalunaarsuisartoq, Guinnes World Records nittartakkamini taama allaaserisaqarpoq.
Anistonip nittartakkatigut attaveqaqatigiittarfikkut siullermeertumik assimik oktobarip 15-ianni siammarterigami akunnerit tallimat minutsillu 16-init ingerlanerinnaani millioninit malinnaaffigineqalerpoq. Asseq siammartigaa tassaavoq ”Friends”-imi inuttaaqatinilu tallimat assiliseqatiginerat, taannalu ima allagartalersimallugu:
- Instagramimi aamma ikinngutigiilerpugut. Hi Instagram.
Assit 12 millioningajannit nuannarineqarluni qisuariarfigineqarsimavoq.
Isiginnaartitsisartoq ”Friends”-ip kingorna ingerlalluarnerpaanerarneqartarpoq, taannalu sisamanngornermi ullaakkut 10,9 millioninit malinnitseqalereersimavoq.
Rekordiliineq taanna 2019-imi pingajussaanik maanna qaangerneqarpoq.
Rekordiliisut kingulliit tassaapput tuluit kunngikkormiuinit prins Harry nulialu Meghan, taakku ataatsimoortumik Instragramimik ukioq manna apriilimi ammaapput. Taakku quppernerat akunnerit tallimat 45 minutsillu ingerlaneranni millioninit malinnaaffigineqalerpoq.
Kunngikkormiut rekordiliinnginneranni nipilersornermit popimit ilimaneqartoq koreamiu, Kang Daniel rekordiliisuunikuuvoq, taanna akunnerit aqqanillit minutsillu 36-t ingerlaneranni millioninit malinnitseqalerpoq. Koreamiup Argentinamit pave Fransip rekordiliinerani ukiuni pingasuni qaangerneqarsimanngitsoq qaangersimavaa.
Jennifer Anistonimtut malinnaalerniartut piffissap sivikitsup ingerlanerani amerlatsingaarmata taakkuma quppernera sivikitsumik iserfigineqarsinnaajunnaatallassimavoq. Guardian taama allaaserisaqarpoq.
/ritzau/