Frederik Elsner: Misigisaq nuanneqaaq
- Taama misigisaqarluni nuannersorujussuuvoq. Ukiorpassuit sungiusarnikuulluni taamatullu tusaartinneqarluni assut nuannerpoq, Frederik Elsner oqarpoq.
23-nik ukiullip Frederik Elsnerip aasaq Ålandimi Island Gamesimi ataatsimik kuultinnallunilu marlunnik sølvinnannera, marlukkaarlunilu unammiuaarnerni Nunatsinni pissartanngornera timersullammattut toqqarneqarneranut ilaatigut tunuliaqutaapput, timersuutiminullu tunniusimasuunera toqqaanermut aamma tunuliaqutaasoq, Kalaallit Nunaanni Timersoqatigiit siulersuisuini ilaasortap Rikke Biilmannip oqaatigaa:
- Timersorneq Frederiup ukioq naallugulu ulluinnarsiutigaa. Taassuma saniatigut unammiuaarnerni assigiinngitsuni tunniusimalluarlunilu takutitsilluartarnermigut toqqarneqarpoq. Assut pikkorissoq tamatta takusinnaavarput, ilungersuullugulu timersortarnera takusinnaavarput, takutitsilluarusullunilu nukini tamaasa atorlugit aamma Nunarput sinnerlugu sassarusuttarpoq, Rikke Biilmann oqarpoq.
Timersullammattut toqqarneqarnini sumut atorsinnaaneraa Frederik Elsnerimut apeqqutigaarput, akivorlu:
- Nukittorsaatigisinnaavara, aamma sulorartartut allat, timersortartulluunniit allat nukissamik nutaamik tunisinnaassallugit neriuutigaara, Frederik Elsner oqarpoq.
Aningaasat katillugit 10.000 koruunit, angalanissamullu atugassat 8000 koruunit timersullammattut toqqarneqarnerup saniatigut Frederik Elsnerip pissarsiarai.
