Franskit timmisartuat ujaarineqalerpoq
Brasiliap Afrikallu akornanni immami ikuallututut isikkulimmik timmisartut tamaani ingerlaartut aquttuisa oqaatigaat, taamaammallu tamaani maanna ujarlertoqarluni. Brasilimiut timmisartuat Atlantikoq qulaallugu ingerlaarnerata nalaani timmisartoq Air France-imeersoq nakkarsimassangatinneqarpoq.
Brasiliamiut timmisartuutileqatigiiffiata oqaaseqartartua Jorge Amaral taama oqarpoq.
Timmisartoq Air France-imit pigineqartoq 228-nik issimasoqarluni akunnerni sisamani ingerlaareerluni radarikkut takussaajunnaarpoq, naalagaatalu taamaalisoqanngitsiarnerani oqaatigaa aalaruluttukkuulersimallutik.
Innaallagissatigut atortorissaarutitigut ajornartorsiulersimapput, ajunaalernermili kalerrisaaruteqartoqarsimanngitsoq aamma nalunaarutigineqarpoq.
Timmisartup kallerup inneranit eqqorneqarsimanissaa Air France-imeersut ilimagaat, timmisartulli kallerup inneranit eqqorneqakulagaluarlutik nakkarneq ajoraluarput. Innaallagissatigulli atortorissaarutitigut ajornartorsiutit kingunerisaanik timmisartoq aqukkuminaallisinnaavoq, nakkarfiatalu nalaani silaannaq aalaruluttorujussuummat nakkarsimanissaa ernummatigineqarpoq.
Arnaq qallunaaq, Norskit pingasut, Islandiminngaanneersorlu ataaseq maqaasineqartut, Danmarkip nunanut allanut ministereqarfiata nalunaarutigaa. Danmarkip Radioata nittartagaani taama allaaserinnittoqarpoq.
