Franskit timmisartuat nakkarsimassangatinneqarpoq
Timmisartoq ullaassaq nalunaaqutaq sisamat qeqqa qaangilaaraa, radarikkut takuneqarsinnaajunnaarpoq - Brasiliami illoqarfissuarmit qangattarnerminit nalunaaquttap akunnerisa sisamaata affaa qaangiuttorlu, tamatumalu kingornagut tusarfigineqaqqinnani. Timmisartoq radarikkut takussaajunnaartinnagu, naalagaata oqaatigaa, aalaruluttorsuakkoorsimallutik, innaallagissatigullu atortorissaarutiminnik ajornartorsiuteqarlutik.
Timmisartup Brasiliap Avannaata Afrikallu kimmut sinneriaata akornanni immamut nakkarsimanissaa Frankrigimi oqartussat ernummatigaat.
Timmisartortitseqatigiiffiup Air Francep nalunaarutigaa, timmisartumut ilaasut amerlanersaat Brasiliamiuullutillu Franskiusut, taamaattorli maqaasineqartunut ilaasut qallunaaq ataaseq, Islandimiu ataaseq, Norskit pingasut Svenskerlu ataaseq.
Franskit timmisartortitseqatigiiffiannut ajunaarneq manna ajunaarnerit annersaraat, nunanilu tamalaani ukiut qulit sinnillit timmisartuussinermi ajunaarnerit annersaralugu.
