Franskit qulit Afghanistanimi toqutaapput

NATO-p sakkutuui saassusseqattaaraluartut Talebanit qanoq ilillutik akersuuttuarsinnaanersut Danmarks Radiomi tusagassiortup Hans Jørgen Stadsingip naliliiffigaa.

Talebanit akersuuttuarsinnaapput nutaanik tapersersortissaminnik Pakistanimiit ilalersortuarsinnaagamik. Pakistanimimi præsidentip ippassaq tunuartup, Musharrafip Pakistanimi Al Qaedap Talebanillu Afghanistanimut isaaffinnaavi matusinnaasimanngilai. Naalagaaffiillu killit sakkutuunik Afghanistaniliartitsinialernitik tamaasa oqallisererujussuaqqaartarnerat aamma sanngeequtaavoq. Taamaalillutik peqqarniisaarniat piumasaminnik pisinnaapput, sakkulersorlunilu peqqarniisaarnianik akiuiniarneq ajornartupilussuaq naluneqanngilaq. NATO-p sakkutuui akisinnaalluaraluartut toqutaasoqaraangamik, soorlu maanna Frankrigimeersut taava naalakkersuisuisa sakkutuumik angerlartiinnarnissaat eqqartoqqaalertarpaat, taamaalilluni NATO-p sakkutuui politikkikkut sanngiillisarneqartarput, Talebanillu taamatut ajornartoortitsisarnertik tulluusimaarutigisarlugulu nukittuallaatigisarpaat. Maannakkut NATO-p sakkutuui Afghanistanimiittut suminngaanneeraluarpataluunniit ataatsimoortillugit akersuutsittalerniaraluarpaat, naalagaaffiilli immikkut tamarmik assigiinngitsunik piumasaqartartillugit sakkutuut ataatsimut aqunniarnissaat ajornakusoortuassaaq.