Franskeq ilisimasassarsiortoq Nersornaammik Kultiusumik nersornaaserneqassaaq
Jean Malauri maanna 87-inik ukioqartoq inuunermini sivisuumi Kalaallit Nunaanni nunanilu issittuni naggueqatigiit Inuit franskinit nunanillu tamalaanit paasineqarnissaannut ilisimasaqarfigineqalernissaannullu malunnaateqarluartumik ilapittuuteqarsimavoq. Jean Malauri 1950-imi Franskit naalagaaffiani ilisimatuussutsikkut misissuiffiani sulilerpoq, taamanili ilisimatusarnermini “inuk” qitiutillugu sulivoq. Ukioq 1950-imi Jean Malauri Siorapalummiippoq , qaammatinilu 14-ini inuunerat, oqaluasaavi ileqquilu paasisaqarfigiumallugit taavani Inughuit inooqatigalugit. Ukiuni tulliuttuni Jean Malauri arlaleriarluni Kalaallit Nunaata avannaanut angalavoqimmikkullu Thulep eqqaani nuna assiliaralugu. Tassunga atatillugu Pituffimmi Amerikamiut sakkutooqarfiat taamani isertuussaq paasigamiuk, taamanili atuakkiami tusaamaneqarnerpaaq De sidste konger i Thule (Thulemi Kunngit kingullersai) allassallugu isumassarsivoq. Atuagaq taanna oqaatsit assigiinngitsut 26-it atorlugit saqqummersinneqarpoq. Jean Malauri nunami tassani Inughuit tatigilerlugulu ikinngutigilerpaat. Atuakkiaani filmiliaanilu amerlaqisuni naggueqatigiit Inuit ataqqilluinnarai aammalu pinngortitamut immikkut ilisimasaqarnerannut tunniusimanerannullu nuannaartorilluinnarai takuneqarsinnaavoq.
Jean Malauri Kalaallit Nunaanni pissutsit inuillu pillugit atuakkanik arlalinnik saqqummersitsivoq filminillu arlalinnik suliaqarluni. Saqqummersittagai naqitat nangeqattaartussiallu ”Terre humaine” iluaqutaallutik inooqatigiit pillugit ilisimatusartut aamma inuit kikkulluunniit akornanni nunarsuaq
tamakkerlugu ataqatigiisitsisinnaalerpoq. 1957-imi Frankrigimi ilisimatusarfiit nuimanerpaat ilaat Parisimiittoq Issittoq pillugu Qitiusumik Misissuiffik Jean Malaurip tunngavilerpaa. 2007-imi marsip qaammataani siuttoralugu Qitiusumik
Misissuiffik ukiut 50-inngorlugit nalliuttorsiorpoq.
