Frankrigip Raqqamik saassussineri takussutissaanerusut
Illoqarfik Raqqa ippassaq unnukkut saassunneqarpoq. Islamisk Stat illoqarfimmi tassani pingaarnerpaatut inissisimapput. Timmisartut atorlugit saassunneqarput, ikinnerpaamik quleriarluni saassussisoqarsimalluni. Timmisartut Jordanimit De Forenede Arabiske Emiraterinit qangattarput.
Saassussinerilli takussutissaanerusut, sakkutuut naalagaata soraarninngornikup oqaatigaa. Qaartartut 20-t igeriunneqarsimasut, Frankrigip illersornissamut ministeriata nalunaarutigaa, eqqugassatillu eqqorsimagaat oqaatigineqarluni.
Islamisiortut sungiusartarfii sakkussiaateqarfiilu saassunneqarsimasut nalunaarutigineqarpoq. Taamaattoq Islamisk Statimeersut oqaatigaat saassussisoqannginnerani tassanga qimagutereersimallutik.