Frankrigip præsidentia makkuluppallaarnerarpaat
Qangaanersusoq franskit præsidentii innuttaminnut nalliuttorsuarni oqalugiarluartartuupput. Kingullertigulli Frankrig-ip præsidentia Nicolas Sarkozy innuttaminut oqalugiaraangami politikkimut attuumassuteqanngitsunik oqalugiartualersimavoq.
Præsidentiulersoq sunut tamanut akuliuttunngorsimavoq, ministeriuninilu vicevært-itut, arpaartitut, kiffakuluttullu inississimallugu.
Inatsisillu nutaat atulersut oqalugiarnerni malittarisassat nutaat atortuulersippai. Inatsisitaami aalajangersarneqarpoq oqalugiarnerni tusagassiutitigut oqaaseqarnerni oqalugiaatip pingajorarterutaa naalakkersuisut, pingajorarterutaa naalakkersuisuutitaqartut partiiata, oqalugiarnerillu pingajorarterutaa kingulleq illuatungililuttut atortassagaat. Inatsisitaamili præsidenti qanoq sivisutigisumik oqalugiartassanersoq allaqqanngilaq.
Tamanna tunngavigalugu tusagassiutini sulisut oqaaseqarnerni piffissaq nakkutigeqqissaalerpaat. Præsident Sarkozy isiginnaarutikkut ullut tamarluinnaasa nutaarsiassaqarnerit tamaasa akuleruttuaannalersimavoq, suulluunniit oqaluuserineqaraangata. Maannali socialistit siulittaasorisimasaata Francois Orlan-ip eqqartuussisutigoorlugu uppernarsartippaa taamak ingerlaannartoqarsinnaanngitsoq. Eqqartuussisut præsidentip oqaaserisartagaasa naalakkersuinermut, partiinulluunniit tunngatinneqarnersut takujuminaatsippaat. Maanna tusagassiuteqarnermi nakkutilliisuutitat CSA-p suliassarilerpaa præsident Nicolas Sarkozy oqalugiaraangat nalilersortassallugu præsidentitut, partiiniluunniit sinnerlugu oqaaseqarnersoq.
