Frankrigimi sisorariartarfimmi ikuallarujussuartoqarnerani inuit marluk ajunaartut

Frankrigimi illoqarfimmi sisorariartarfimmi Courchevelimi illu ikuallarujussuarmat inuit marluk ajunaarput, allallu 22-t ajoquserlutik.

Najukkami oqartussat naapertorlugit illoqarfiup qeqqani illu, ukiup ilaatigut sulisartut najugaqarfiat, sapaammi ullaakkut nal. 04.30 ikuallalerpoq. Qatserisartut katillugit 70-t qatserinermi peqataapput.

Ajoqusertut 22-t ilaat sisamat annertuumik ajoqusersimapput. Inuillu 60-it - ilaatigut allamiut arlallit - illumit qimagussortinneqarput.

Inuinnaat filmiliaanni Facebookikkut saqqummersinneqartuni takuneqarsinnaavoq Courchevelimi illumi init qulleriit qullersaat ikuallattupilussuaq. BBC-lu naapertorlugu inuk ikuallagussaajumanani igalaakkut pissittoq immiussat ilaanni takuneqarsinnaavoq.

Ajunaartut suli kinaassusersineqanngillat. Najukkami atorfilittat ilaat, Frederic Loiseau, Frankrigimi tv-qarfimmut BFMTV-mut taama oqarpoq. Ajoqusernerillu tamakkiisumik suli paasineqanngitsut, ilanngullugu oqaatigaa.

- Ajoqusernerpaanut tunngatillugu nakkarlutik ajoqusersimanersut nalileruminaappoq. Ikuallattoqarnera init quleriit pingajuanni aallartimmat inuit arlallit ikuallagussaajumanatik igalaakkut pissittariaqarsimasut, BBC naapertorlugu taama oqarpoq.

Ikuallattoqarneranut suna pissutaanersoq suli paasineqanngilaq.

/ritzau/AP