Frankrigimi præsidentimut qineqqusaarput
Franskit sapaatiuppat præsidentimut qinersiartukaasussaapput, præsidentinngorniuttullu qineqqusaarnertik ippassaq naggataarpaat.
Isumasiuinerni siuttuusoq, Nicolas Sarkozy, konservatiusoq, ippassaq Marseillesiippoq:
Præsidentimut qineqqusaartup konservatiusup, Nicolas Sarkosy-p, saamerliuniaq Segolin Royal ippassaq unnukkut assut saassutaraa.
Isumasiuinerit kingulliit takutippaat Nicolas Sarkozy 27 procentinit taaguunneqartoq, unammillertaalu Secolin Royal 26 procentinit. Qiterliuniarnerusoq, Francois Bayrou 17 procentinit, taavalu nunamik pingaartitsilluinnartoq, nunasisunillu akeqqersimaartuusoq, Jean-Marie Le Pen 16 procentinit taaguunneqarsimapput. Kisitsisilli taakku tassa isumasiuinerinnaapput, franskillu pingajorarterutaasa sukkut krydsiliinissartik suli naluvaat.
DR-p malinnaatitaa, Jan Ewens, Parisimiit oqarpoq, qinersinissaq maanna soqutigineqartorujussuusoq, kiisalu nutaanik qinigassanngortittoqartoq, nutaaqqissaanik isumalinnik.
Inuusuttut siornatigut perulluliorlutillu eqqissiviilliortitsisarsimasut, Parisillu avatinnguani biilinik ikuallaasarsimasut, aamma soqutiginnilluartut oqaatigineqarpoq. Taakku Secolin Royal qinissagaat ilimagineqarpoq, taannalu aamma ippassaq unnukkut naggataarutaasumik qineqqusaarpoq.
