Paasissutissat kingulliit Frankrigimi peqqarniisaartoqarmat inuit aqqaneq-marluk toqutaasimapput

Inuit qulit ikiligaasimapput, taakkunannga tallimat ikilingaatsiarneqarsimallutik.

- Pruffiiti pillugu akiniaavugut, saassussisut saassussinerminni suaartarsimasut, Frankrigimi politiit oqaatigaat.

30-riarluni eqqartoqarsimassagunartoq, takunnittup oqaluttuaraa.

Parisimi taama saassussisoqareersorlu isumannaallisaaniarneq oqartussanit annertusineqarsimavoq, Frankrigillu præsidentia Francois Hollande, Charlie Hebdop aaqqissuisoqarfianut saassussinerup kingorna orniguppoq, Frankrigimilu naalakkersuisut ataatsimiikkasuartinneqarnissaat piumasarisimallugu.

Takunnittoq Frankrigimi TV-qarfiit ilaannut kanal 1-imit kingorna oqaloqatigineqarpoq:

- Angutit kiinnaminnik assiaquteqarlutik aaqqissuisoqarfimmik ulloqeqqanut qiteqqunnerata missaani saassussipput, eqqarasuartaatillu Kalashnikovit atorlugit saassussillutik. Kingorna eqqartoqarpaluttoq tusaasinnaavarput, takunnittoq oqarpoq, saassussisullu kingorna qimaasut takusimanerarlugit.

Qimaasut taakku biilit tiguarsimavaat, pisuinnarlu qimaanerminni aamma aporsimallugu.

Atuagassiaq Charlie Hebdo, quiasaarutinik saqqummersitsisarpoq, muslimillu pruffiitiannut Muhammedimut tunngasunik titartakkanik quppernernik 64-inik immikkut saqqummersitseqqammerluni.

Muhammed pillugu Danmarkimi titartakkat ukiualunnguit matuma siornatigut saqqummersinneqartut matumani tunuliaqutaasimassagunartut oqaatigineqarpoq. Atuagassiaq Muhammedimut tunngasunik siusinnerusukkut saqqummersitsinikuuvoq, aaqqissuisoqarfialu tamanna pillugu 2011-mi ikuallatsinneqarniarnikuugaluarluni.

Muslimit ikinnerpaamik 4 millionit Frankrigimi najugaqarput, Europamilu nunani muslimeqarnerpaanut ilaalluni.