Frankrigimi naalakkersuisortaat ivertinneqartut

Frankrig ullumikkut nutaanik naalakkersuisoqalerpoq. Tamanna pivoq ministeriunertaaq Francois Fillon ullaap tungaa ministerissanik 15-iusunik toqqaammat. Maluginiarneqarnerpaaq tassaavoq nunanut allanut ministerinngortoq, socialistiusoq Bernard Kouchner.

Bernard Kouchner nunanut allanut Europamullu ministeriussaaq, ministeriuffissai pingaaruteqarnerpaasussaallutik. Kouchner Socialistpartiimut ilaasortaavoq Frankrigimilu “Læger uden grænser” aallartitaralugu.

Frankrigimi innuttaasut akornanni nuannarineqartorujussuuvoq, socialistpartiimili ilaasortaaffigisamini nuannarineqanngilluinnarluni, ilaatigut tusagassiuutitigut takoqqusaallaqqippallaarnini pissutigalugu.

Socialistpartiip siulittaasuata, Kouchnerip toqqarneqarneranut atatillugu taavaa talerperliunianut ministerinngornerarlugu.

Taamaattorli Bernard Kouchner isumaqarpoq, allaanerusumik ingerlatsisinnaalluni, talerperliuniallu naalakkersuisuini kiffaanngissuseqarluni oqalussinnaanissani taasisinnaanissanilu qulakkeersimavai.

Nutaamik ministereqarfiliortoqarpoq, nunasisunut inuiaassutsimullu ministereqarfittaami ministerinngussaaq Sarkozy-p nuannarilluinnagaa Brice Hortefeux.

Ministeeriaqarfiup taassuma nunasiniartut akuersissuteqanngitsut ujarneqarnissaat isumagissavaa, nassaarineqarpatalu angerlarartinneqarnissaat isumagissallugu aamma ilaqutariit ilaquttaminnik nunasisitsisarnerat sukannernerulersinneqassaaq.

Alain Juppés siusinnerusukkut ministeriunerusimasoq 2004-mi aningaasanik peqquserluuteqarsimanini pissutigalugu tunuartitaasoq maanna politikeritut uteqqippoq, matumuuna avatangiisinut ineriartortitsinermullu ministeritut, gassimik toqunartortalimmik aniatitsinerup nukissamillu atuinerup minnerulernissaanik suliaqartussatut.

Alain Juppés Frankrigip Al Core-atut imminut suaarutigereerpoq.

Kingulliullugu minnerunngitsumilli taaneqassaaq ministeriunissatut ippassaq præsidentimit toqqarneqartoq Francois Fillon.

Qinersisartut 61 procentiisa toqqaaneq pitsaasutut isigaat.

Frankrigimi ministerinngortut affaat arnaapput.