Frankrigimi akerliussutsimik takutitsinerit ajornartorsiortitsilerput
Tamatumalu mittarfissuarmit tassannga timmisartunik qangattartoqarsinnaajunnaarnera kingunerisinnaavaa.
Sulisartut nassiussalerisut akerliussutsiminnik takutitsisut orsersortarfinnik assersuinerat tamatumunnga pissutaavoq.
Timmisartuussisarnermut Qullersaqarfiup timmisartuutileqatigiit Charles de Gaulle-mut timmisartuussigaangamik uternissaminnut orsussamik nassartaqqullugit qinnuigisimagai, Aviisimi La Tribune-mi allaaserineqarpoq.
Timmisartut ingerlaarfiini isorartunnginnerusuni akunnattumillu isorartussusilinni, timmisartut Parisimi orsersortariaqanngitsut, kisimik mittarfissuarmut aqqusaarsisinnaasut oqaatigineqarpoq.
Soraarninngorsinnaanerup 60-iniit 62-inik ukioqalernissamut naalakkersuisunit kinguartinneqarniarnera, Frankrigimi akerliussutsimik takutitsinernut pissutaavoq.
Frankrigimi sulisartut kattuffiisa oqaatigaat, inuit 2 aamma 3 millionit akornanniittut aqqusinerni ingerlaarlutik akerliussutsiminnik takutitsisimasut, politiilli aamma naalakkersuisut naliliillutik oqaatigaat, akerliussutsimik takutitsisut 825.000-it missilioraat.