Frankrig Tuluillu Nunaat Burmami pisunik uparuaapput
Frankrig Tuluillu Nunaat Burmami Myanmarimi oqartussanik maanna uparuaapput.
Ikiuiniaqatigiiffiit ajornartorsiorfinnut ikiuutinik apuussisinnaannginnerannut oqartussat pisooqataanerarneqarput.
Kiattup anorersuaanik anorersuareernerata kingorna ajunaarsimasut maqaasineqartullu maanna 133.000-iupput.
Burmami generalit nalunaarutigereerpaat ajunaartut ilimagisamit amerlanerusut, taamaattorli ikiuiniaqatigiit pisariaqartitsisunut amerlaqisunut anngunnissamut killilersorneqarput.
- Pinngortitap nammineq piliaanik ajunaarnersuaqaraluarput, kisianni aamma inuit pissaanillit piliaannik ikiuiniarneq akimmisaartinneqarpoq, taama tuluit ministeriunerat Gordon Brown oqarpoq.
Franskit isumaqarpoq, Burmami oqartussat nunat tamat isiginneriaasiat malillugu pinerluutit annersaannik maanna piliarigaat, tassa inuiaqatigiinnik pisariaqartitsinerpaanut pinerlunneq annerpaaq, nunap avataanit ikiuiniartunik ajattuineq.
