Aningaasaliissutissat nalornissutigineqartut
Naalakkersuisut Nunatsinni mittarfinnik tallilerinissamut piffissaliussap naammassinissaa ajornakusoortittupilussuussagunarpaat.
Attaveqaqatigiinnermummi naalakkersuisoq, Múte Borup Egede, Partii Naleqqameersup Anthon Frederiksenip apeqquteqaataanut akissuteqarluni allappoq mittarfinnik sanaartornissamut pilersaarutip ataatsimoortup piviusunngortinneqarnissaanut ataatsimut katillugit aningaasartuutissat suli "annertoorujussuarmik nalorninartortaqartut".
Nuummi, Qaqortumi Ilulissanilu mittarfinnik sanaartorneq pilersaarutit malillugit 2017-imi aallartinneqartussaavoq.
Nuummi tallilerineq Qaqortumi mittarfiliorneq 2018-imi naammassineqartussatut atulerneqartussatullu pilersaarutigineqarput.
Suliniutilli aningaasalersorneqarnissaat suli nalorninartortaqartupilussuupput:
- Aningaasaqarnermut Akileraartarnermullu Naalakkersuisoqarfik paasissutissiivoq, pilersaarutip ataatsimoortup piviusunngortinneqarnissaanut ataatsimut katillugit aningaasartuutissat suli annertoorujussuarmik nalorninartortaqartut, Múte Bourup Egede Anthon Frederiksenimut taama akissuteqarpoq.
