Illersornissaqarfik illoqarfinnukalerunarpoq: Sakkutuunngorsinnaanerlutit misilitsigit

Nunatsinneersut naalagaaffeqatigiit illersornissaannut atorfissaqartinneqartut illersornissamut ministeri Trine Bramsen oqarpoq.

Danmarkimi illersornissaqarfiup qullersaqarfianneersut misilitsitsiartorlutik oktobarip 24-ani 25-anilu Aasianniissapput, oktobarip 27-ani 28-anilu Sisimiuni misilitsittoqarsinnaajumaarpoq, Nuummi novembarip aallaqqaataani aappaannilu taavalu Qaqortumi novembarip arfernanni.

- Sakkutuujusussaanermut inuusuttut misilitsissinnaanerannut ajornannginnerusumik aqqutisiorsimavugut. Illoqarfinni taakkunani sisamaasuni takkutiinnarluni misilitsittoqarsinnaavoq, uagullu piareersimajumaarpugut, Illersornissaqarfimmeersoq kaptajn Dennis Rasmussen oqarpoq.

AAMMA ATUARUK Illersornissaqarfik nunatsinneersunit piumasoq

Illoqarfinni misilitsiffiusinnaasuni 18-ileereersimasut napparsimavimmut saaffiginnillutik misilitsissapput. Misilitsinnermi silassorissuseq, peqqissuseq akunnerup aappaa avillugu sivisussusilimmi misissorneqassaaq.

- Ullormi tassani sakkutuujusussaanermut piukkunnarnerluni naleqqutinnginnerluniluunniit paasineqassaaq. Naleqqukkaanni Danmarkimi sakkutuunngorniarfimmi ilinnialernissamut ingerlaannaq isumaqatigiissusiortoqarsinnaavoq, Dennis Rasmussen oqarpoq.

Kalallit sakkutuut pisariaqartinneqartut

Piukkunnaraanni illersornissaqarfimmi immikkoortut sisamat, tassalu nunami, imaani, timmisartuni sakkutuutut upalungaarsimasutulluunniit ilinniartunngortoqarsinnaavoq.

Illersornissaqarfiup nunatsinni misilitsitsisinnaalernera ilorraap tungaanut nikeriarnerusoq illersornissamut ministerip Trine Bramsenip oqaatigaa.

- Kalaallit Nunaanni inuusuttunut sakkutuujusussaanermut misilitsinnissamut eqqarsaateqartunut taamaammat oqarusuppunga: Atorfissaqarteqaatsigit. Illersornissaqarfiup Kalaallit Nunaaniinnerani siunissami suleqatigiinnissamut kunngeqarfiullu tamarmi isumannaatsuunissaanut pingaaruteqarluinnartuuvusi, Trine Bramsen oqarpoq.

Illersornissaqarfik Nuummi siorna aamma misilitsittoqarnissaanik periarfissiinikuuvoq, soqutiginnittoqangaarmallu illoqarfinni sisamani misilitsittoqarsinnaanissaanut maanna periarfissiipput.00:02:57

Siorna misilitsinnermi inuusuttut 22-t sakkutuunngorniassallutik isumaqatigiissusiorput.

Illoqarfinni taakkunani ullormi misilitsiffiusuni nalunaaqutaq quliniit arfineq-marluk tungaanut misilitsikkiortortoqarsinnaavoq. Piffissamik inniminneeqqaarnissaq pisariaqanngilaq.