Ilisimatuut Camp Centurymi qillerinerminni gassimik aniatitsisut

Ilisimatuut Danmarkimi Kalaallit Nunaannilu ujarassiuutut misissuiffimmi GEUS-imeersut ukioq manna aasap ingerlanerani qillerimmata gassimik Sermersuarmiittumik siumuipput. Ilisimatuut atortunik Sermersuarmi ikkussuipput, amerikamiut sakkutooqarfigisimasaanit uuttortaanissat pillugit atortulersuillutik. Taamaalinerani gassi aniasoq paasineqarpoq.

Qillerut 60 meterisut ititigisumut pimmat gassit assigiinngitsut seerilersimapput. Gassip seerilernera silap pissusianik immikkut ilisimasallip, suliniummillu aqutsisup William Colganiip ernumanartoqartippaa.

- Nittaalaleruttornerata nalaani gassi anialerpoq, nittaallat apummut tukkiartortut ilaat qullarteqqinneqartut takuneqarsinnaavoq. Qanorpiaq pisoqarnersoq naluarput, gassilli anianeraneersuusimassaaq, William Colgan oqarpoq.

AAMMA ATUARUK Eqqagassat naatsorsuutigisamit siammaqqanerusut

Gassit sorpiaat anianersut ilisimatuut ilisimanngikkaluaraat gassit misissorneqartariaqartutut nalilerneqanngillat, qinngornerimmi radioaktiviusut annikimmata ilisimatuunut aarlerinaateqanngitsutut nalilerneqarput.

Gassit akunnerni 36-ni aniapput, putorlu kingorna matuneqarluni. Immikkulli ilisimasalik DTU-meersoq Sven Nielsen oqarpoq gassi aniasoq qinngornernik ulorianartunik annikitsunnguanik akoqarsinnaasoq:

- Gassi aniasoq tassaasinnaavoq brinti radioaktiviusoq, allaasinnaavorluunniit. Amerikamiummi uulia glykolimillu pisagaat annertooq qimaannarpaat, gassillu aniasut taakkunannganeersuusinnaapput, Sven Nielsen, DTU-meersoq oqarpoq.

Eqqakkat radioaktiviusut qimaannarneqarsimasut annikitsuinnaammata peqqissutsimut aarlerinaateqarunanngitsut, taassuma oqaatigaa.

AAMMA ATUARUK Misissuinerit aallartinneqartussanngortut