Visit Greenland: Siulittaasup siuariarneq nuannaarutigaa

Visit Greenlandip 2017-imi suliarpassui, aningaasaqarnikkullu angusai, Visit Greenlandimi siulersuisuni siulittaasup Kenneth Høeghip, Visit Greenlandip ileqquusumik ataatsimeersuarnerani naammagisimaarpai.
Assi © : Visit Greenland
Allattoq Karsten Sommer
juunip 07-at 2018 12:55

Takornarialerinermi siuariartortoqarpoq, unnuisimasutullu nunatsinni nalunaarsorneqarsimasut 10 procentinik siuariarfiusimasoq takuneqarsinnaalluni.

Takornariat 2017-imi katillugit 84.300-t missaanniipput, umiarsuarnut ilaallutik takornariat taakkunannga 27.425-iusimallutik.

- Kisitsisit takutippaat nunatsinni takornarialerineq pitsaasumik siunissaqartoq, Visit Greenlandimi siulittaasuujunnaartoq Kenneth Høegh, pingasunngornermi ataatsimeersuartoqarnerani oqarpoq, nangillunilu:

- Taama naatsorsuuteqartoqarneranut aallaavigineqarpoq angalanernik allaaserinnittartut tusagassiorfiillu Kalaallit Nunaannik Issittullu nunataanik soqutigisaqarlutik saaffiginnittartut 2016-imut naleqqiullugu 44 procentinik amerleriarsimammata, Kenneth Høegh oqarpoq.

Taanna Visit Greenlandimi siulersuisuni ukiuni kingullerni sisamani siulittaasooreerluni tunuarpoq.

Air Greenlandip niuernermut pisortaa Maliina Abelsen, Namminersorlutik Oqartussanit toqqarneqartoq, ataatsimeersuarnermi siulittaasunngorpoq. Siulersuisuni ilaasortat sinneri qinigaaqqipput.

Visit Greenlandimi siulersuisut KNR.GL-imi atuarneqarsinnaapput:

  • Maliina Abelsen, siulittaasoq
  • Anette Grønkjær Lings
  • Erik Bjerregaard
  • Johanne Bech
  • Sakiko Daorana
  • Arni Gunnarsson

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk