Folketingip Savalimmiormiut inuiattut ulluanni siusinaarlutik pilluaqqusisut

Folketingip Savalimmiormiut inuiattut ullumi ullorsiorneranni pilluaqquai.

Folketingi Facebookikkut taamaaliorpoq. Savalimmiormiulli inuiattut ullorsiorfiat, ólavsøka, qaammat ataaseq qaangiuppat, juulip ulluisa 29-anni aatsaat nalliussineqassaaq.

Savalimmiuni tusagassiorfik Sosialurin, taama allaaserisaqarpoq.

Taamatut Danmarkimi oqartussanit siusinaartumik pilluaqqusisoqartarnera takornartaanngilaq.

- Danmarkimi oqartussat sooq pinerpoq ukiumiit ukiumut Savalimmiormiut inuiattut, juunip ulluisa 29-anni, ullorsiorneranni pilluaqqusarpaat. Qaammammik ataatsimik sioqqutsillutik, Sosialurin allappoq.

Erfalasorinngisaannik erfalasuliisut

Savalimmiormiut inuiattut ullorsiorneranni naalagaaffiup suliffeqarfiisa ulloq taanna erfalasulertarnissaat, Lars Løkke Rasmussenip ministerunerunerata nalaani eqqunneqarmat, siullerpaamik taamaaliortoqarmat Savalimmiormiut erfalasorinngisaannik taamaaliortoqarpoq.

Savalimmiormiut tamanna ajuusaarutiginngikkaat, Sosialurinip allaaseraa.

- Savalimmiuni tamanna quiagiinnarpaat, Danmarkimmi tungaaniit pimmatiginninnertut nalilinnginnamikku, ilisimaassutsimilli takutitsisuuginnarnerartarlugu.

Kunngi Olavip illernartup ukioq 1030-mi toqunera eqqaaniarlugu Savalimmiormiut inuiattut ukiut tamaassa ullorsiortarput.