Folketingip ombudsmandiata Tasiilami isertitsivik apeqquserpaa

Tasiilami politeqarfiup mattussivianut mattussaasunut atugassarititaasut pillugit Folketingip ombudsmandia Hans Gammeltoft Hansen sukannersunik maanna apeqquteqarpoq. Tasiilami isertitsivimmut isertitaasartut pillugit avisimi Sermitsiami siorna septembarip qaammataani allaaserineqariitsiartut ombudsmandi Hans Gammeltoft Hansen siullermik apeqqusiivoq, paasissutissallu pissarsiariumasani aatsaat qanittukkut pissarsiarai. Ombudsmandeqarfimmi nakkutilliinermut pisortaq Lennart Frandsen ima oqarpoq:

- Tasilaami isertitsivimmut isertitaasartut inissaaruttarsimanerannik siorna 2006-imi septembarip qaammataani paasitinneqarpugut. Oqaatigineqarpoq isertitsivimmi ataatsimi 6 kvadratmeterisut annertutigisumi inuit arfinillit tikillugit isersimasariaqartarsimasut, ilaatigullu isertitaasut amerlagaangata taavalu arnartaqaraangata angutinit immikkoortillugit isertitsivimmiittariaqartunik, taava ulikkaarluinnartarsimasoq. Aamma unnuiinnartussaanngitsut isertitsiveerannguaniittariaqartarsimapput. Paasisagut taakku tunngavigalugit Pineqaatissiisarneq pillugu Pisortaqarfimmut Kalaallit Nunaannilu Politimestereqarfimmut apeqquteqarsimavugut, Lennart Frandsen nassuiaavoq.

Tasiilap isertitsiviani pissutsit apeqquteqarnermi paaserusunneqarsimapput, apeqquteqaatinullu akissut ukioq manna junip qaammataani tiguneqarsimavoq.

Lennart Frandsen aperaarput akineqarnissamut taama sivisutigisumik utaqqisimanerat sulianiarnerannut qanoq sunniuteqarsimanersoq.

- Tasiilap isertitsiviani siorna 2006-imi pissutsit qanoq issimanerat pillugu paasissutissat tassa pissarsiaraagut, naluarpulli ukioq manna pissutsit qanoq innersut. Sivisuumik utaqqisimanerput pissutigalugu iliuuseqajaarsinnaasimanngilagut. Taamaattoq isumaqarpunga maanna akissutissat pissarsiarereeratsigit siumut isigaluta sulisariaqartugut.

Tassa apeqqutigaarput Tasiilap isertitsiviani pissutsit siunissami qanoq iliuuseqarfiginiarneqarsut, Lennart Frandsen oqarpoq.