Folketingip avatangiisinut ataatsimiititaliaa nunatsinnukarlerpoq

Danmarkimi Avatangiisinut Ministeri Connie Hedegaard, ulluni makkunani nunatsinniittoq, Folketingip Avatangiisinut Ataatsimiititaliaanut ilaasortaanit, tallimanngorpamiit sapaatip-akunnera ataaseq tikeraartussanit, angalaqatigineqassaaq.

Ataatsimiititaliap oqaluuserisassaasa ilagaat sila, aatsitassat arferillu.

- Nuummi Namminersornerullutik Oqartussat allaffeqarfianut pulaarnitsinni Kalaallit Nunaanni ullumikkut pissutsit paasiniaaffigissavagut, silap kiatsikkiartorneranut aatsitassarsiornermullu tunngasut, tassuunakkut paaserusukkatsigu suliassarujussuit, soorlu aluminiumik aatsitsiviliorniarnermut tunngasut, avatangiisinut qanoq sunniuteqartarnersut, Folketingip Avatangiisinut Ataatsimiititaliaata siulittaasua Christian Wedell-Neergaard oqarpoq.

Angalaqatigiit aamma Ilulissiassapput, taavaniinnerminni sermersuup aakkiartornera namminneq isiminnik takuniassammassuk.

Angalaqataanissarlu assut soqutigineqarpoq.

- Ataatsimiititaliap soqutigisorujussuuai Kalaallit Nunaanni pisut, taamaattumik peqataarusuttoqarsimaqaaq, oqarpoq.

Christian Wedell-Neergaardip aamma ilimagaa arfanniarnermut tunngasunik oqallinnissaq, naalagaaffeqatigiinnerup iluani aamma Danmarkip EU-llu iluani oqallisaanikorujussuummat.

- Arfanniariaatsit assut oqallisaasarsimapput. Isumaqarpungalu kalaallit, arferit naalliutsinneqannginnissaat pillugu toqutsigasuartarnissaq salliutittariaqaraat. Kisianni tassa, nammineq isitsinnik maanna pissutsit takunialerpagut, Wedell-Neergaard erseqqissaavoq.