Folketingimut qinersisoqarataannaasoq Karen Jespersenip ilimagaa
Ministeriunerup Anders Fogh Rasmussenip Folketingimut qinersinissaq septembarip ulluisa 11-ianni pisussanngorlugu nalunaarutigissappagu – tassa sapaatit akunneri pingasuinnannguit qaangippata – tamanna namminiilivinnissamut ataatsimiititaliarsuup suliaanut kinguneqarnerlorataannaavoq.
Pilersaarutit malillugit namminersorneq pillugu ataatsimiititaliarsuup isumaliuutissiissusiani naammasseriigaq Folketingimut Inatsisartunullu oqallisissanngorlugu tunniuttussaagaluarpaa.
Namminersorneq pillugu ataatsimiititaliarsuaq politikerinik kalaallinik qallunaanillu ilaasortaqartoq 2004-miilli sulilluni aallartissimavoq.
Venstre-p qinigassanngortitaasa ilaat Karen Jespersenip qularutiginngilaa, ministeriunerup Anders Fogh Rasmussenip Folketingimut qinersinissaq nalunaarutigissagaa, ministeriunerullu qinersinissap ullussaa ullualunnguit qaangiuppata nalunaarutigiumaaraa.
Jyllandspostenimi ilanngutassiat malillugit Karen Jespersen oqarpoq, Anders Fogh Rasmussenip Folketingimut qinersinissaq tulleq septembarip ulluisa 11-ianni pissasoq nalunaarutigissagaa.
