Folketingimut qinersinerup inernera pissanganarluinnartumik inerneqariaannaavoq
Kisianni isumasiuinermi aamma erseqqissarneqarpoq IA ajugaanissaminik qulakkeerinninngitsoq, tassami ippassaq ataasinngorneq tikillugu isumasiorneqartut 40 procentiisa kina qinissanerlugu imaluunniit qinersiartussanerlutik suli aalajangersimanngimmassuk.
HS Analysep isumasiuisitsinera naapertorlugu Inuit Ataqatigiit 32 procentinit taaneqassapput.
Siumut 29 procentinit taaneqassaaq, ilaasortaatitaqarninilu attatiinnassallugu.
Isumasiuineq naapertorlugu Demokraatit 23 procentinit taaneqassapput, 6 procentinillu taaneqarnerugunik Siumup ilaasortaatitaa pissarsiarisinnaavaat.
HS Analyse naapertorlugu qinersinermi matumani Atassutip ilaasortaatitaqalernissani naatsorsuutigisinnaanngilaa, ippassarmi isumasiuinermi 16 procentinit taaneqarami.
HS Analysep isumasiuinermini qinersisartut 813-it tunngavigai.
Isumasiuineq malikannerlugu qinersisoqassappat kalaallit qinigaatitaat ministeriunissamik qinersinissami aalajangiisunngorsinnaapput. Tassami Danmarkimi saamerliuniat talerperliuniallu ippassaq unnunnera tikillugu naligiittorujussuummata.