Folketingimut ilaasortat Nunatsinnut paasisassarsiorialersut
Politikerit angalanertik Ilulissani aallartissavaat, ilaatigut Kangiata sermia, nunarsuarmioqatigiinnut kingornussassanngortinneqarsimasoq takuniassallugu, aamma pineqaatissinneqarsimasunut inissiisarfik illoqarfimmiittoq pulaassavaat.
Ilulissaniissinnarlutik kujavartissapput. Umiarsuarmut alapernaarsuummut Ejnar Mikkelsenimut ilaallutik Aasiannukassapput, Sisimiunut Maniitsumullu. Angalanerat Nuummi naggaserneqassaaq.
Folketingimut ilaasortat alakkartigassaat ilaatigut tassaapput Royal Greenlandip tunitsivia, nerisassanik tunisassiorfik Lilleholm Food, ilinniartoqarfiit kulturileriffiillu arlallit kiisalu aamma Pinerluuteqarsimasunik Nakkutilliisoqarfimmeersunik, Nunatta Eqqartuussivianeersunik Naalakkersuisunullu ilaasortanik naapeqateqassallutik.
Aammattaaq nunaqarfiit Ilimanaq aamma Kisitsissuarsuit sivikitsumik tikinneqassapput.
Folketingimi partiit tamarmik immikkut ilaasortaatitaminnik ataatsimik peqataatitsisinnaapput. SF aamma De Konservative kisiartaallutik angalanissamut qujaannarsimapput, taamaalillutillu Dansk Folkeparti aamma Socialdemokraatit tamarmik immikkut marlunnik angalatitaqassallutik.
