Folketingimut ilaasortaq suli ataaseq kalaallinik siuaasaqarpoq
Arnat sisamat 23-nik ukiullit Folketingimut nutaatut ilaasortanngortut ullaaq oqaluttuaraarput. Taakkununnga ilaavoq Kalaallit Nunaanneersoq Juliane Henningsen – aammali ilaasortanngortoq alla kalaallinik siuleqarpoq. 23-nik ukiulik, Julie Rademacher, Socialdemokratineersoq - Sydjylland-ip qinersivissuani qinigaasoq – iluliarmiup Peter Guldagerip panigaa.
-Kalaallit Nunaanni ilaquttakka attaveqarfigivallaanngilakka, aamma Kalaallit Nunaanniinnikuungilanga. Ilaqutariinni ajornartorsiuteqarnikuuvugut, taamaattumik ilaquttakka attaveqarfigivallaanngilakka, Julie Rademacher oqaluttuarpoq nangillunili:
-Kisianni naaperusussinaavakka, aamma Kalaallit Nunaata sammineqarnerunissaa kissaatigaara, Folketingimut ilasortanngorlaaq, Kalaallit Nunaannukarusuttoq, oqarpoq.
-Uagut danskit nunasiaatilittut pinnginnissarput, kalaallinullu inuiaqatigiinnut tusarnaarnerunissarput, pingaarteqaara, Socialdemokratit sinnerlugit Folketingimi ilasortaq, 23-nik ukiulik, Julie Rademacher oqarpoq.