Folketingimi oqalugiarngaarpoq
Juliane Henningsen, Inuit Ataqatigiit sinnerlugit folketingimut qinigaaqqammersoq, folketingimi ullumi ulloqeqqanngitsiartoq oqalugiarngaarpoq, nunarpullu sinnerlugu sulilernissani qilanaaralugu oqariartuuteqaatigaluni, Danmarkimi nunarsuarmioqatigiinnermilu suliassat aallarnisarneqarnissaannut atatillugu suleqataanissaminut qilanaarnerarluni.
- Silap pissusaata allanngoriartornera ilutigalugu suliassat annikilliartuaarnavianngillat, Juliane Henningsen oqaluttarfimmit oqarpoq, silallu pissusaata allanngoriartorneranik akiuiniarnermi Nunatta ilaatinneqarnerulernissaa ujartorlugu.
- Silap Pissusaa pillugu Ilisimatusarfissamut Nuummiittussamut atatillugu Danmarkip naalakkersuisuisa Kalaallit Nunaat tusarniaavigeqqaarnagu pilersaarusiorsimasut, Juliane Henningsenip oqaatigaa, silap pissusaata allanngoriartornera pillugu Københavnimi 2009-mi ataatsimiinnissap pilersaarusiorneqarnerani assinganik iliortoqarsimasoq, Juliane Henningsenip aamma oqaatigaa.
Nunatta Danmarkillu suleqatigiinnerulernissaannik Juliane Henningsenip oqariartuutaanut ministeriuneq Anders Fogh Rasmussen akissuteqarpoq, Silap pissusaata allanngoriartornera pillugu Københavnimi ataatsimiinnissamut atatillugu Nunatta Savalimmiullu peqataatinneqarnissaat neriorsuutigalugu.
Namminersorneq pillugu Isumalioqatigiissitap suliaata piaartumik naammassineqarnissaa sulissutiginiarini ministeriunerup aamma oqaatigaa.