Folketingimi kalaallisut oqaluttoqaqqusaanersoq nalunartoq
Nunatsinni Inatsisartuni oqaaseqartarfimmit danskisut kalaallisullu oqalunnissaq nalinginnaalluinnartoq tamanna danskit folketingianni ulluinnarni suliamit allaanerulluinnarpoq.
Ilaasortamit oqaaseqartarfimmit kalaallisut arlaleriarluni oqartoqarnikuuvoq, taamaattoqaraangallu oqaaseqartup oqaatsini nammineerluni danskisuumut nutsertarpai.
Kalaalerli Folketingimut qinerneqartoq danskisoorsinnaanngippat qanoq iliortoqassava?
Folketingip sulinerata ingerlanga sunaana?
Folketingip ingerlasinnaassanik aalajangersimasunik malittarisassaqartariaqarpoq. Taakku sulinerup ingerlarngani, Folketingip nammineq aalajangigaani atuarneqarsinnaapput.
Tassani ataatsimiinnerit qanoq ingerlanissaannut, qanoq taasisoqarnissaanut malittarisassat qanorlu Folketingimi oqaluttoqarnissaanut malittarisassat atuarneqarsinnaapput.
Sulinerup ingerlaneranut malittarisassani assersuutigalugu ataatsimiittarfimmi imminnut Hr.-imik Fru.-millu taaguuttoqarnissaa atuarneqarsinnaavoq.
Paasissutissarsiffik: Folketinget.dk
Ilaasortamik danskisut oqalunneq ajortumik qinigaasoqarpat susoqassanera Folketingip aalajangertaraa Folketingip Paasissutissiiffiata innuttaasumut marlunngornermi allappaa.
- Folketingip suleriaasissani tunngaviusumik inatsit §48 naapertorlugu nammineq aalajangersartarpaa. Suleriaasissaq oqaatsinut aalajangersakkanik ilaqanngitsoq, akissummi allassimavoq.
Tassa imaappoq Folketingimi danskisuinnaq oqaloqqusaasoqarnersoq malittarisassani erseqqissumik allassimanngilaq. Aamma Folketingimi ilaasortat kalaallisut, savalimmiormiusut tuluttulluunniit oqaloqqusaanersut allassimanngilaq.
Folketingip Paasissutissiivianit akissut naapertorlugu oqaatsitigut aporfinnut tungnatillugu aaqqiissutissarsiortoqassaaq.
- Apeqqut Folketingimut suli qaqinneqanngilaq, kisianni pisumi oqaatsitigut ajornartorsiuteqartoqarnerani aaqqiissutissarsiortoqassasoq eqqaaneqassaaq.
Hans Enoksen: Kalaallisuinnaq oqalukkama ajukkutinngilanga
Hans Enoksenip Naleqqameersup folketingimut qinigassanngortinneratigut oqaatsinut apeqqut ukkatarineqalerpoq.
Hans Enoksenimi danskisut oqalunneq ajorpoq, taamaammat taanna qinigaassagaluarpat susoqassanersoq erseqqissarneqassaaq.
AAMMA ATUARUK Hans Enoksen folketingemut sassartoq: Kalaallisuinnaq oqalukkama ajukkutinngilanga
Qineqqusaartorlu aperigaanni taassuma kalaallisut oqaatsillit Danmarkimiittut nunatsinni danskisut oqaatsillit iliuuseqarfigineqartarneratulli iliuuseqarfigineqartariaqarsorai.
- Maani misilittakkagut takoreernikuuakka danskisut maani oqaluttut apeqqusinngiivillugit kiffartuunneqartartut, tamakkiisumillu nutserunneqartarlutik, taava naalagaaffiup iluani uanga allaanerusumik sooq pineqassaanga.
Kalaallisuinnaq oqalukkama ajukkutinngilanga, Hans Enoksen KNR-imut oqarpoq.
Kalaallit politikerit 15-it folketingimut novembarip aallaqqaataani qinersinissamut qinigassanngortipput. Taakkunannga marluinnaat nunarput sinnerlugu qinigaaffimmi Folketingimiilersussatut qinerneqarsinnaapput.
