Folketingimi illuatungiliuttut misissuisoqarnissaa piumasaraat
Arlaannaannulluunniit attuumassuteqanngitsunit misissuisoqarnissaa qulaajaasussanilluunniit isumalioqatigiissitaliortoqarnissaa Danmarkimi naalakkersuisunut illuatungiliuttut piumasarissamaarpaat.
Europarådimi Folketingimilu ilaasortaq, Morten Østergård oqarpoq, paasissutissat pasinartullu saqqumersut taama amerlatigisut takoreerlugit misissortariaqarparput nunat tamat isumaqatigiissusiaannik, soorlu inuit pisinnaatitaaffiinut tunngasunik unioqqutitsinernut killeqarfitta iluani akulerunneqartarsimanerluta. Maanna misissuisitsisariaqalerpugut, immaqalu qulaajaanissamut isumalioqatigiissitamik pilersitsisariaqassalluta Danmarkimili Naalakkersuisut siulliullugit paasitittariaqarput CIA-p timmisartuutaasa angalasarsimanerinut pasinartut taama amerlatigisut eqqortuussappata amerikamiunut qanoq iliuuseqarnissaq eqqartorneqartinnagu tunngavilersuutissatsinnik pisariaqartugut, Danmarkimi naalakkersuisut naalagaaffiup killeqarfiata iluani qanoq pisoqartarsimanera miserratigiunnaartariaqarpaat. Uagutsinnut soqutaavallaanngilaq Danmarkimi Kalaallit Nunaannulluunniit mittarsimassanersut pingaarnerpaavorli paasissallugu CIA-meersut timmisartut inunnik ajortumeeriniatut pasisaminnik aallarussiniarlutik aqqusaartarsimanersut imaluunniit tigusanik paarnaarussivinnukaassillutik ilaasoqartarsimanersut. Inatsisinik unioqqutitsinernut taamakkununnga akulerunneqartarsimanerluta paasisariaqarparput, Europarådimi Folketingimilu ilaasortaq, Morten Østergård oqarpoq.
